ಕಾಪಿರೈಟ್ ನಿಯಮ ಉಲ್ಲಂಘನೆ: ನಿಂತುಹೋದ ರಾಮಾಯಣ ಸಿನಿಮಾ ಶೂಟಿಂಗ್

•   Tue, May 21 2024 10:20:28 PM



• ಮುಂಬೈ, ಮೇ 21 (DaijiworldNews/AA): ರಣಬೀರ್ ಕಪೂರ್ ರಾಮನಾಗಿ ಹಾಗೂ ಸಾಯಿ ಪಲ್ಲವಿ ಸೀತೆಯಾಗಿ ನಟಿಸುತ್ತಿರುವ ಬಹುನಿರೀಕ್ಷಿತ ರಾಮಾಯಣ ಸಿನಿಮಾದ ಶೂಟಿಂಗ್ ಕಾಪಿರೈಟ್ ಉಲ್ಲಂಘನೆಯಿAದಾಗಿ ನಿಂತುಹೋಗಿದೆ.

  ಇತ್ತೀಚೆಗಷ್ಟೇ ಸಿನಿಮಾ ಚಿತ್ರೀಕರಣ ಸೆಟ್ ನಿಂದ ಕೆಲ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದ್ದವು. ಆದರೀಗ ಸಿನಿಮಾ ನಿರ್ಮಾಪಕರು ಕಾಪಿರೈಟ್ ನಿಯಮವನ್ನು ಉಲ್ಲಘಿಸಿರುವುದರಿಂದ ಶೂಟಿಂಗ್ ನಿಂತಿದೆ ಎಂದು ವರದಿಯಾಗಿದೆ.

  ನಿತೇಶ್ ತಿವಾರಿ ಅವರು 'ರಾಮಾಯಣ' ಸಿನಿಮಾಗೆ ನಿರ್ದೇಶನ ಮಾಡುತ್ತಿದ್ದಾರೆ. ಕೆಲವೇ ದಿನಗಳ ಹಿಂದೆ ಈ ಸಿನಿಮಾ ತಂಡಕ್ಕೆ ಕಂಪನಿಯೊಂದು ನೋಟಿಸ್ ಕಳಿಸಿತ್ತು. ಅದರ ಅನ್ವಯ 'ರಾಮಾಯಣ' ಸಿನಿಮಾದ ನಿರ್ಮಾಪಕರು ಈ ಕಂಪನಿಯ ಜೊತೆ ಮಾಡಿಕೊಂಡ ಒಪ್ಪಂದದ ಅನುಸಾರ ಸ್ಕ್ರಿಪ್ಟ್ ಗೆ ಸಂಬಂಧಿಸಿದ ಕೆಲ ಹಕ್ಕುಗಳನ್ನು ಖರೀದಿ ಮಾಡಬೇಕಿತ್ತು. ಆ ಪ್ರಕ್ರಿಯೆ ಪೂರ್ಣಗೊಳ್ಳದ ಕಾರಣ ಕಂಪನಿಯು ನೋಟಿಸ್ ಕಳಿಸಿತ್ತು.

  ಈ ನೋಟಿಸ್ ಬಂದ ಬಳಿಕವೂ ಕೆಲವು ದಿನಗಳ ಕಾಲ ರಾಮಾಯಣ ಸಿನಿಮಾದ ಶೂಟಿಂಗ್ ಮುಂದುವರಿಸಲಾಯಿತು. ಆದರೆ ಕಳೆದ ವಾರದಿಂದ ಶೂಟಿಂಗ್ ಸ್ಥಗಿತಗೊಳಿಸಲಾಗಿದೆ. ಸಿನಿಮಾಗೆ ಸಂಬಂಧಪಟ್ಟ ಕಾನೂನಿನ ತೊಡಕುಗಳು ಬಗೆಹರಿದ ಬಳಿಕವೇ ಶೂಟಿಂಗ್ ಮುಂದುವರಿಸಲು ತೀರ್ಮಾನ ಮಾಡಲಾಗಿದೆ ಎಂದು ತಿಳಿದುಬಂದಿದೆ.