ಪ್ರಾಧ್ಯಾಪಕರ ಪಾತ್ರದಲ್ಲಿ ಮಿಂಚಲಿರುವ ಅರವಿಂದ ಬೋಳಾರ್

•   Wed, May 01 2019 12:02:49 PM



• ಮಂಗಳೂರು,ಮೇ 1 (Daijiworld News/MSP): ಕುತೂಹಲ ಮೂಡಿಸುವಂಥ ಟೈಟಲ್ ಮೂಲಕ ಜನರ ಗಮನ ಸೆಳೆಯುತ್ತಿರುವ ಆಯೆ ಏರ್ ಸಿನಿಮಾದ ಟೀಸರ್‌ಗೆ ಸೋಶೀಯಲ್ ಮೀಡಿಯಾದಲ್ಲಿ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿದ್ದು, ಚಿತ್ರ ಯಾವಾಗ ಬಿಡುಗಡೆಯಾಗುತ್ತದೆ ಎಂದು ಚಿತ್ರಪ್ರೇಮಿಗಳು ಕಾಯುತ್ತಿದ್ದಾರೆ.

  

  ಈ ಸಿನಿಮಾಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ, ಸಾಹಿತ್ಯ ಒದಗಿಸುವ ಮೂಲಕ ಕೆ. ಮಂಜುನಾಥ್ ಅವರು ವಿಶೆಷ ಕೊಡುಗೆ ನೀಡುತ್ತಿದ್ದಾರೆ. ಶ್ರೀಕಾಂತ್ ರೈ ಅವರು ನಾಯಕನಾಗಿ ನಟಿಸಿರುವ ಈ ಸಿನಿಮಾವನ್ನು ನಿರ್ದೇಶಿಸಿದ್ದು ಕೂಡ ಮಂಜುನಾಥ್ ಅವರೇ. ಕರಾವಳಿಯ ಹಲವಾರು ಹೊಸ ಪ್ರತಿಭೆಗಳಿಗೆ ಈ ಸಿನಿಮಾದಲ್ಲಿ ಅವಕಾಶ ನೀಡಲಾಗಿದೆ. ಅರವಿಂದ ಬೋಳಾರ್ ಅವರು ಪ್ರಮುಖ ಪಾತ್ರದಲ್ಲಿರುವುದರಿಂದ ಹೊಟ್ಟೆ ತುಂಬಾ ನಗು ಖಚಿತ. ಅರುಣ್ ಖ್ಯಾತಿಯ ಶ್ರೀಧರ ದೀಕ್ಷಿತ್ ಸಂಗೀತದಲ್ಲಿ ಮೂಡಿ ಬರುವ ಈ ಸಿನಿಮಾಕ್ಕೆ ಶ್ರೀನಿವಾಸನ್ ಅವರ ಛಾಯಾಗ್ರಹಣವಿದೆ. ನೃತ್ಯದ ಜವಾಬ್ದಾರಿ ವಿಕ್ರಮ್ ಅವರದ್ದು. ಟೋನಿ ಸಹ ನಿರ್ದೇಶಕರಾಗಿದ್ದು, ಸಂಕಲನದ ಜವಾಬ್ದಾರಿಯನ್ನು ಕಾರ್ತಿಕ್ ವಹಿಸಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ೪ ಹಾಡುಗಳಿರಲಿವೆ. ಸಂಗೀತದ ಮೂಲಕವೇ ಫೈಟ್ ಮಾಡುವುದು ಈ ಸಿನಿಮಾದ ಒಂದು ವಿಶೇಷತೆ.

  ಕನ್ನಡದ ಜಂತರ್ ಮಂತರ್, ಪುಣ್ಯಾತಿಗಿತ್ತಿಯರು ಸಿನಿಮಾದಲ್ಲಿ ನಟಿಸಿದ್ದ ಸಂಭ್ರಮ ಅವರು ಈ ಸಿನಿಮಾದಲ್ಲಿ ನಾಯಕಿಯಾಗಿದ್ದು, ಇದು ಅವರಿಗೆ ಮೊದಲ ತುಳು ಸಿನಿಮಾ ಆಗಿದೆ. ಈ ಸಿನಿಮಾವು ಒಂದು ಸೆಂಟಿಮೆಂಟಲ್ ಸಿನಿಮಾ ಆಗಿದ್ದು, ಉತ್ತಮ ಸಂದೇಶವನ್ನೂ ಇದು ನೀಡುತ್ತಿದೆ. ಇದರಲ್ಲಿ ನಟಿಸಲು ಅವಕಾಶ ಸಿಕ್ಕಿರುವುದು ನನ್ನ ಅದೃಷ್ಟ. ಮುಂದೆಯೂ ಉತ್ತಮ ಅವಕಾಶ ಸಿಕ್ಕಲ್ಲಿ ತುಳುವಿನಲ್ಲಿ ನಟಿಸುವೆ ಎಂದು ಸಂಭ್ರಮ ಹೇಳುತ್ತಿದ್ದಾರೆ. ಈ ಸಿನಿಮಾದ ಚಿತ್ರೀಕರಣವು ಸುಮಾರು ೩೬ ದಿನಗಳ ಕಾಲ ಕಾರ್ಕಳ ಸುತ್ತಮುತ್ತ ನಡೆದಿದೆ.

  ಅರವಿಂದ ಬೋಳಾರ್ ಅವರದ್ದು ಕಾಲೇಜು ಪ್ರಾಧ್ಯಾಪಕರ ಪಾತ್ರ. ಅವರಿಗೆ ಮಕ್ಕಳಾಗದ ಕಾರಣ ಅವರು ಕುಡಿತದ ಚಟಕ್ಕೆ ಬೀಳುವ ದೃಶ್ಯಗಳು ಇದರಲ್ಲಿರಲಿವೆ. ಜತೆಗೆ ಕುಡಿತದ ವಿರುದ್ಧ ಒಂದು ಉತ್ತಮ ಸಂದೇಶವನ್ನೂ ಈ ಸಿನಿಮಾ ನೀಡಲಿದೆ.