ಪರ ಭಾಷೆಯಿಂದ ರುಕ್ಮಿಣಿ ವಸಂತ್ ಅವರನ್ನು ಹುಡುಕಿ ಬರುತ್ತಿದೆ ಭರ್ಜರಿ ಆಫರ್​ ಗಳು

•   Fri, Feb 16 2024 05:05:36 PM



• ಚೆನ್ನೈ, ಫೆ 16 (DaijiworldNews/AA): ’ಸಪ್ತ ಸಾಗರದಾಚೆ ಎಲ್ಲೋ’ ’ಸೈಡ್ ಎ’ ’ಸೈಡ್ ಬಿ’ ಸಿನಿಮಾದಲ್ಲಿ ನಟ ರಕ್ಷಿತ್ ಶೆಟ್ಟಿ ಅವರಿಗೆ ಜೋಡಿಯಾಗಿ ಕಾಣಿಸಿಕೊಂಡ ನಟಿ ರುಕ್ಮಿಣಿ ವಸಂತ್ ಅವರು ತಮ್ಮ ನಟನೆಯ ಮೂಲಕ ಎಲ್ಲರ ಗಮನ ಸೆಳೆದಿದ್ದರು. ಈ ಕಾರಣದಿಂದಲೇ ಕನ್ನಡವಷ್ಟೇ ಅಲ್ಲದೇ ಬೇರೆ ಭಾಷೆಗಳಿಂದಲೂ ಸಾಕಷ್ಟು ಆಫರ್ ಗಳು ರುಕ್ಮಿಣಿ ಅವರನ್ನು ಹುಡುಕಿ ಬರುತ್ತಿದೆ.

  ಪ್ರಸ್ತುತ ನಟಿ ರುಕ್ಮಿಣಿ ಅವರ ಬೇಡಿಕೆ, ಪರ ಭಾಷೆಗಳಲ್ಲೂ ಹೆಚ್ಚಾಗಿದೆ. ನಟ ವಿಜಯ್ ಸೇತುಪತಿ ನಟನೆಯ 51ನೇ ಚಿತ್ರದಲ್ಲಿ ರುಕ್ಮಿಣಿ ನಾಯಕಿಯಾಗಿ ನಟಿಸಿದ್ದು, ಈಗಾಗಲೇ ಚಿತ್ರದ ಸಂಪೂರ್ಣ ಶೂಟಿಂಗ್ ಮುಗಿದಿದೆ. ಇದೀಗ ಕಾಲಿವುಡ್ ನಟ ಶಿವಕಾರ್ತಿಕೇಯನ್ ಅವರ ಹೊಸ ಸಿನಿಮಾವೊಂದಲ್ಲಿ ರುಕ್ಮಿಣಿ ಅವರು ನಾಯಕಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಇದರೊಂದಿಗೆ ಹಲವು ಸಿನಿಮಾಗಳ ಆಫರ್ ಗಳು ಕೂಡ ಅವರನ್ನು ಹುಡುಕಿ ಬರುತ್ತಿದೆ.

  ರುಕ್ಮಿಣಿ ವಸಂತ್ ಅವರು ಕನ್ನಡದಲ್ಲಿ ಶ್ರೀ ಮುರುಳಿ ನಾಯಕ ನಟನಾಗಿ ಕಾಣಿಸಿಕೊಳ್ಳುತ್ತಿರುವ ’ಭಗೀರ’ ಸಿನಿಮಾದಲ್ಲಿ ನಾಯಕಿ ಆಗಿ ಕಾಣಿಸಿಕೊಳ್ಳಲಿದ್ದಾರೆ. ಜೊತೆಗೆ ಡಾ. ಶಿವರಾಜ್ ಕುಮಾರ್ ನಟನೆಯ ’ಭೈರತಿ ರಣಗಲ್’ ಸಿನಿಮಾದಲ್ಲೂ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಇನ್ನು ನಟ ವಿಜಯ್ ದೇವರಕೊಂಡ ಅವರ ಹೊಸ ಸಿನಿಮಾಗೆ ರುಕ್ಮಿಣಿ ವಸಂತ್ ಅವರು ನಾಯಕಿ ಆಗಲಿದ್ದಾರೆ ಎಂಬ ಸುದ್ದಿ ಹರಿದಾಡಿತ್ತು. ಆದರೆ ’ನಾನು ವಿಜಯ್ ಅವರಿಂದಿಗೆ ಸಿನಿಮಾ ಮಾಡುತ್ತಿಲ್ಲ. ಅದು ಕೇವಲ ವದಂತಿಯಷ್ಟೇ’ ಎಂದು ನಟಿ ಸ್ಪಷ್ಟನೆ ನೀಡಿದ್ದರು.