ಮತ್ತೆ ಸೆಟ್ಟೇರಿದ ಸಿಲ್ಕ್ ಸ್ಮಿತಾ ಕುರಿತಾದ ಸಿನಿಮಾ

•   Sun, Dec 03 2023 12:06:58 PM



• ಚೆನೈ, ಡಿ 03 (DaijiworldNews/AA): 80-90ರ ದಶಕದಲ್ಲಿ ನಟಿ ಸಿಲ್ಕ್ ಸ್ಮಿತಾಗೆ ಸ್ಟಾರ್ ನಟರುಗಳಿಗೆ ಇದ್ದಷ್ಟೇ ಬೇಡಿಕೆ ಇತ್ತು. ಪಡ್ಡೆ ಹುಡುಗರ ನಿದ್ದೆ ಕೆಡಿಸಿದ್ದ ಈ ನಟಿ ಹಲವು ಹಿಟ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ.

  ಮಾದಕ ನಟಿ ಎಂದೇ ಖ್ಯಾತಿ ಪಡೆದ ನಟಿ ಸಿಲ್ಕ್ ಸ್ಮಿತ ಇಂದು ಬದುಕಿದ್ದರೆ 63 ವರ್ಷವಾಗಿರುತ್ತಿತ್ತು. ಸುಮಾರು 400ಕ್ಕೂ ಅಧಿಕ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿರುವ ಸಿಲ್ಕ್ ಸ್ಮಿತಾ ಅವರ ಜೀವನ ಕುರಿತಾದ ಸಿನಿಮಾವೊಂದು ಸೆಟ್ಟೇರಿದೆ. ಈಗಾಗಲೇ ಸಿನಿಮಾದ ಪೋಸ್ಟರ್ ಬಿಡುಗಡೆಯಾಗಿದ್ದು, ಸಿನಿಮಾಕ್ಕೆ 'ಸಿಲ್ಕ್ ಸ್ಮಿತಾ; ದಿ ಅನ್​ಟೋಲ್ಡ್ ಸ್ಟೋರಿ' ಎಂದು ಹೆಸರಿಡಲಾಗಿದೆ.

  "ಸಾರ್ವಕಾಲಿಕ ಚೆಲುವೆ ಸಿಲ್ಕ್ ಸ್ಮಿತಾರ 63ನೇ ವರ್ಷದ ಹುಟ್ಟುಹಬ್ಬದಂದು, ಸಿಲ್ಕ್ ಸ್ಮಿತಾರ ಕುಟುಂಬದ ಆಶೀರ್ವಾದದೊಂದಿಗೆ ನಾವು ಸಿಲ್ಕ್ ಸ್ಮಿತಾರ ಕತೆಯನ್ನು ಪ್ರಪಂಚಕ್ಕೆ ಹೇಳಲು ಹೊರಟಿದ್ದೇವೆ" ಎಂದು ಸಿಲ್ಕ್ ಸ್ಮಿತಾ ಪಾತ್ರದಲ್ಲಿ ನಟನೆ ಮಾಡುತ್ತಿರುವ ಬಗ್ಗೆ ನಟಿ ಚಂದ್ರಿಕಾ ರವಿ ಟ್ವೀಟ್ ಮಾಡಿದ್ದಾರೆ.

  ಇನ್ನು ಸಿನಿಮಾವನ್ನು ಜಯರಾಂ ನಿರ್ದೇಶನ ಮಾಡುತ್ತಿದ್ದು, ನಟಿ ಚಂದ್ರಿಕಾ ರವಿ ಅವರು ಸಿಲ್ಕ್ ಸ್ಮಿತಾ ಆಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ಸಿನಿಮಾವನ್ನು ಎಸ್​ಬಿ ಸ್ವಾಮಿ ನಿರ್ಮಾಣ ಮಾಡುತ್ತಿದ್ದಾರೆ. ಈಗಾಗಲೇ ಸಿಲ್ಕ್ ಸ್ಮಿತ ಅವರ ಜೀವನ ಆಧರಿಸಿ ಹಲವಾರು ಸಿನಿಮಾಗಳು ತೆರೆಕಂಡಿವೆ. ಇದೀಗ ಈ ಪಟ್ಟಿಗೆ 'ಸಿಲ್ಕ್ ಸ್ಮಿತಾ; ದಿ ಅನ್​ಟೋಲ್ಡ್ ಸ್ಟೋರಿ' ಎಂಬ ಈ ಸಿನಿಮಾವು ಸೇರಿಕೊಳ್ಳಲಿದೆ.