ಬಿಗ್‌ಬಾಸ್‌ ಮನೆಯಿಂದ ಹೊರಹೋಗ್ತೀನಿ ಎಂದು ವರ್ತೂರು ಕಣ್ಣೀರು

•   Sun, Nov 12 2023 06:19:57 PM



• ಬೆಂಗಳೂರು, ನ. 12 (DaijiworldNews/SK): ಕೆಲ ದಿನಗಳ ಹಿಂದೆ ಹುಲಿ ಉಗುರನ್ನು ಧರಿಸಿರುವ ವಿಚಾರವಾಗಿ ಬಿಗ್ ಬಾಸ್ ಮನೆಯಿಂದ ವರ್ತೂರು ಸಂತೋಷ್ ಅವರನ್ನು ಬಂಧಿಸಲಾಗಿತ್ತು.

  ಇದಾದ ಬಳಿಕ ಮತ್ತೆ ಬೇಲ್‌ ಮೂಲಕ ಹೊರ ಬಂದು ಸ್ಪರ್ಧೆಯಲ್ಲಿ ಭಾಗವಹಿಸಿದ್ದು ಮನೆಗೆ ಬಂದ ವಾರವೇ ನಾಮಿನೇಟ್ ಆಗಿದ್ದರು. ಹೀಗಿರುವಾಗ ವಾರದ ಕೊನೆಯಲ್ಲಿ ಕಿಚ್ಚನ ಪಂಚಾಯತಿಯಲ್ಲಿ ವರ್ತೂರು ಸಂತೋಷ್ ನೀವು ಸೇವ್ ಆಗಿದ್ದೀರಿ ಎಂದು ಸುದೀಪ್ ತಿಳಿಸಿದರೂ ಕೂಡ ಬಿಗ್ ಬಾಸ್‌ನಿಂದ ಹೊರಬರುತ್ತೇನೆ ಎಂದು ವರ್ತೂರು ಸಂತೋಷ್ ಪಟ್ಟು ಹಿಡಿದಿರುವ ಪ್ರೋಮೋ ಇದೀಗಾ ವೈರಲ್ ಆಗಿದೆ.

  ಪ್ರೋಮೊ ಒಂದರಲ್ಲಿ ವರ್ತೂರ್ ಮನಬಿಚ್ಚಿ ತಮ್ಮ ಸಂಕಟವನ್ನು ಹೇಳಿಕೊಂಡಿದ್ದಾರೆ. ಹೊರಗೆ ಒಂದು ಘಟನೆ ನಡೆದಿದ್ದು, ಅದರಿಂದ ಹೊರ ಬಂದು ನಾನು ಇಲ್ಲಿ ಆಡಬೇಕು ಎಂದರೆ ಕಷ್ಟ ಆಗುತ್ತಿದೆ. ಮೊದಲಿದ್ದ ಉತ್ಸಹ ನನ್ನಲ್ಲಿ ಈಗಿಲ್ಲ ಎಂದು ವರ್ತೂರ್‌ ಕಣ್ಣೀರು ಹಾಕುವುದರ ಜೊತೆಗೆ ನಾನು ಹೊರಗೆ ಹೋಗ್ತೀನಿ ಎಂದು ಸುದೀಪ್ ಗೆ ಮನವಿ ಮಾಡಿದ್ದಾರೆ.

  
  ಇನ್ನು ವರ್ತೂರ್ ಅವರ ಮಾತಿಗೆ ಅಸಮಾಧಾನ ವ್ಯಕ್ತಪಡಿಸಿದ ಸುದೀಪ್ ನಿಮಗೆ ಬಂದಿರೋ ಮತಗಳ ಸಂಖ್ಯೆ 34 ಲಕ್ಷ. ಜನರ ಅಭಿಪ್ರಾಯದ ವಿರುದ್ಧ ನಾನು ಹೋಗಲ್ಲ ನಿಮ್ಮ ನಿರ್ಧಾರದಿಂದ ನಾನು ತುಂಬಾ ನಿರಾಶೆಗೊಂಡಿದ್ದೇನೆ ಎಂದು ಹೇಳಿ ಸ್ಟೇಜ್‌ನಿಂದ ತೆರಳಿದ್ದಾರೆ.

  
  ಆದರೆ ಸಂತೋಷ್ ಮಾತಿಗೆ ಮನೆಮಂದಿ ಶಾಕ್ ಆಗಿದ್ದಾರೆ. ಇನ್ನು ವರ್ತೂರ್‌ ಮಾತಿಗೆ ಮಣಿದು ಬಿಗ್ ಬಾಸ್ ಮನೆಯಿಂದ ಕಳುಹಿಸಿ ಕೊಡುತ್ತಾರಾ? ಅಥವಾ ಬೇರೆ ಸ್ಪರ್ಧಿಗೆ ಬಿಗ್ ಬಾಸ್ ಆಟ ಕೊನೆಯಾಗುತ್ತಾ ಎಂದು ಕಾದು ನೋಡಬೇಕಿದೆ.