'ವರುಣ್ ಧವನ್‌ರಿಂದ ಬೇಸರವಾಗಿದೆ'-ಹೀಗಂದಿದ್ಯಾಕೆ ನಟಿ ಕೃತಿ ಸನೋನ್?

•   Thu, Mar 09 2023 04:40:36 PM



• ಮುಂಬೈ, ಮಾ 09 (DaijiworldNews/DB): ನಟಿ ಕೃತಿ ಸನೋನ್ ಅತ್ಯಂತ ಬೇಡಿಕೆಯಿರುವ ನಟಿಯರ ಪೈಕಿ ಒಬ್ಬರು. ಪ್ರಭಾಸ್ ಜೊತೆ ಆದಿಪುರುಷ್ ಸಿನಿಮಾದ ಬಳಿಕವಂತೂ ಅವರ ಖ್ಯಾತಿ ಇನ್ನಷ್ಟು ಹೆಚ್ಚಾಗಿತ್ತು.

  ಈ ನಡುವೆ ಈ ಸಿನಿಮಾದ ಬಳಿಕ ಆಗಾಗ ಪ್ರಭಾಸ್ ಮತ್ತು ಕೃತಿ ಒಟ್ಟಿಗೇ ಕಾಣಿಸಿಕೊಳ್ಳುತ್ತಿದ್ದರು. ಇದರಿಂದ ಇವರಿಬ್ಬರೂ ಡೇಟಿಂಗ್ ಮಾಡುತ್ತಿದ್ದಾರೆಂದೇ ಜನ ಗುಲ್ಲೆಬ್ಬಿಸಿದ್ದರು. ಇದೀಗ ಇದೇ ವಿಚಾರವಾಗಿ ನಟ ವರುಣ್ ಧವನ್ ಅವರ ಮೇಲೆ ಬೇಸರವಾಗಿರುವ ವಿಚಾರವನ್ನು ಕೃತಿ ಹಂಚಿಕೊಂಡಿದ್ದಾರೆ.

  ಹೌದು ಇತ್ತೀಚೆಗೆ ಕೃತಿ ಮಾಧ್ಯಮವೊಂದಕ್ಕೆ ಸಂದರ್ಶನ ನೀಡಿದ್ದಾಗ ವರುಣ್ ಧವನ್‌ರಿಂದ ತಮಗೆ ಬೇಸರವಾಗಿರುವ ವಿಚಾರವನ್ನು ಹೇಳಿಕೊಂಡಿದ್ದಾರೆ. ತಾವು ಮತ್ತು ಪ್ರಭಾಸ್ ಪ್ರೀತಿಸುತ್ತಿದ್ದೇವೆಂಬ ವಿಚಾರವನ್ನು ಕರಣ್ ಜೋಹರ್ ಶೋದಲ್ಲಿ ಕಳೆದ ವರ್ಷ ವರುಣ್ ಹೇಳಿದ್ದು, ದೊಡ್ಡ ಸಂಚಲನ ಸೃಷ್ಟಿಸಿತ್ತು. ಅವರ ಈ ಒಂದು ಹೇಳಿಕೆ ಹಲವಾರು ಗೊಂದಲ, ಅನುಮಾನಗಳಿಗೆ ಕಾರಣವಾಗಿತ್ತು. ಇದಕ್ಕಾಗಿ ತನಗೆ ವರುಣ್ ಮೇಲೆ ತುಂಬಾ ಬೇಸರವಾಗಿತ್ತು ಎಂದು ಕೃತಿ ಹೇಳಿಕೊಂಡಿದ್ದಾರೆ.

  ಕಳೆದ ವರ್ಷ ಕರಣ್ ಜೋಹರ್ ಅವರ ಶೋದಲ್ಲಿ ವರುಣ್ ಹಾಗೂ ಕೃತಿ ಭಾಗವಹಿಸಿದ್ದರು. ಈ ವೇಲೆ ಹೀರೋಯಿನ್‌ಗಳ ಹೆಸರು ಪಟ್ಟಿ ಮಾಡಲು ಕರಣ್ ಜೋಹರ್ ವರುಣ್‌ಗೆ ಹೇಳಿದಾಗ ಅವರು ಬಹುತೇಕ ಹೀರೋಯಿನ್‌ಗಳ ಹೆಸರನ್ನು ಪಟ್ಟಿ ಮಾಡಿದ್ದರು. ಆದರೆ ಕೃತಿ ಸನೋನ್ ಹೆಸರನ್ನು ಕೈ ಬಿಟ್ಟಿದ್ದರು. ಇದಕ್ಕೆ ಕಾರಣ ಕೇಳಿದಾಗ ಕೃತಿ ಈಗಾಗಲೇ ಬೇರೆಯವರ ಹೃದಯದಲ್ಲಿದ್ದಾರೆ. ಅವರೀಗ ಮುಂಬಯಿಯಲ್ಲಿ ದೀಪಿಕಾ ಪಡುಕೋಣೆ ಅವರೊಂದಿಗೆ ಶೂಟಿಂಗ್‌ನಲ್ಲಿ ಪಾಲ್ಗೊಂಡಿದ್ದಾರೆ ಎಂದಿದ್ದರು. ವರುಣ್ ಅವರ ಈ ಹೇಳಿಕೆ ಕೃತಿ ಮತ್ತು ಪ್ರಭಾಸ್ ನಡುವಿನ ಪ್ರೀತಿ ಗುಸುಗುಸು ಸುದ್ದಿಗೆ ರೆಕ್ಕೆಪುಕ್ಕ ನೀಡಿತ್ತು.