ಮಗುವಿಗೆ 'ವಾಯು' ಎಂದು ನಾಮಕರಣ ಮಾಡಿದ ನಟಿ ಸೋನಂ ಕಪೂರ್

•   Wed, Sep 21 2022 04:12:21 PM



• ಮುಂಬೈ, ಸೆ 21 (DaijiworldNews/DB): ನಟಿ ಸೋನಂ ಕಪೂರ್-ಆನಂದ್ ಅಹೂಜ ದಂಪತಿಗೆ ಗಂಡು ಮಗುವಾಗಿರುವುದು ಎಲ್ಲರಿಗೂ ತಿಳಿದಿರುವ ವಿಚಾರ. ಇದೀಗ ಮಗುವಿಗೆ ಯಾವ ಹೆಸರಿಡಬಹುದು ಎಂದು ಕಾಯುತ್ತಿದ್ದ ಅಭಿಮಾನಿಗಳಿಗೆ ಮಗುವಿನ ಮುದ್ದಾದ ಹೆಸರನ್ನು ನಟಿ ರಿವೀಲ್ ಮಾಡಿದ್ದಾರೆ.

  ಹಳದಿ ಬಣ್ಣದ ಧಿರಿಸಿನಲ್ಲಿ ನಟಿ ಸೋನಂ ಕಪೂರ್, ಪತಿ ಆನಂದ್ ಅಹೂಜಾ ಹಾಗೂ ಮುದ್ದಾದ ಮಗುವನ್ನು ಹಿಡಿದುಕೊಂಡು ಫೋಟೋಕ್ಕೆ ಪೋಸ್ ನೀಡಿದ್ದಾರೆ. ಪತಿ ಕೈಯಲ್ಲಿ ಮಗುವನ್ನು ಹಿಡಿದುಕೊಂಡು ಸೋನಂಗೆ ಮುತ್ತಿಡುತ್ತಿದ್ದಾರೆ. ಸೋನಂ ಮಗುವನ್ನು ನೋಡುತ್ತಿದ್ದಾರೆ. ಈ ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ನಟಿ, ತಮ್ಮ ಮು‌ದ್ದು ಕಂದನ ಹೆಸರನ್ನೂ ರಿವೀಲ್ ಮಾಡಿದ್ದಾರೆ. ವಾಯು ಕಪೂರ್ ಅಹೂಜಾ ಎಂದು ಮಗುವಿಗೆ ನಾಮಕರಣ ಮಾಡಿರುವುದಾಗಿ ಅವರು ಬರೆದುಕೊಂಡಿದ್ದಾರೆ. ಅಲ್ಲದೆ ಈ ಹೆಸರನ್ನೇ ಯಾಕೆ ಇಡಲಾಗಿದೆ ಎಂಬುದಕ್ಕೂ ವಿವರಣೆ ನೀಡಿದ್ದಾರೆ.

  ಹಿಂದೂ ಧರ್ಮಗ್ರಂಥದ ಪ್ರಕಾರ ವಾಯುವು ಪಂಚಭೂತಗಳಲ್ಲಿ ಒಂದಾಗಿದೆ. ಉಸಿರಾಟದ ದೇವತೆ ವಾಯು. ಅಲ್ಲದೆ ಆತ ಹನುಮಂತನ ತಂದೆ. ಹೀಗಾಗಿ ನಮ್ಮ ಮಗುವಿಗೆ ವಾಯುವಿನ ಹೆಸರಿಡಲಾಗಿದೆ ಎಂದು ಬರೆದುಕೊಂಡಿದ್ದಾರೆ. ಸೋನಂ ಮತ್ತು ಆನಂದ್ ದಂಪತಿಗೆ ಆಗಸ್ಟ್ 20ರಂದು ಗಂಡು ಮಗು ಜನಿಸಿತ್ತು.

  2018ರಲ್ಲಿ ಉದ್ಯಮಿ ಆನಂದ್ ಅಹೂಜಾ ಅವರನ್ನು ಸೋನಂ ಅದ್ದೂರಿಯಾಗಿ ವಿವಾಹವಾಗಿದ್ದರು. ಈ ದಂಪತಿಗೆ ಮದುವೆಯಾಗಿ ನಾಲ್ಕು ವರ್ಷಗಳ ಬಳಿಕ ಮಗು ಜನಿಸಿತ್ತು.