'ನಾನು ಬಾಲಿವುಡ್‌ಗೆ ಎಂಟ್ರಿ ಪಡೆಯಲು 'ಅವರೇ' ಕಾರಣ'-ರಶ್ಮಿಕಾ ಮಂದಣ್ಣ

•   Sat, Sep 17 2022 05:35:27 PM



• ಮುಂಬಯಿ, ಸೆ 17 (DaijiworldNews/DB): ನ್ಯಾಶನಲ್ ಕ್ರಶ್ ರಶ್ಮಿಕಾ ಮಂದಣ್ಣ ಸದ್ಯ ಟಾಲಿವುಡ್, ಬಾಲಿವುಡ್‌ಗಳಲ್ಲಿ ಬಹು ಬೇಡಿಕೆಯ ನಟಿಯಾಗಿದ್ದಾರೆ. ಕಿರಿಕ್ ಬೆಡಗಿ ಕಿರಿಕ್ ಪಾರ್ಟಿ ಚಿತ್ರದಲ್ಲಿ ಕಾಣಿಸಿಕೊಂಡ ಬಳಿಕ ಆಕೆಯ ಅದೃಷ್ಟವೇ ಬದಲಾಗಿದೆ. ಇಂತಹ ರಶ್ಮಿಕಾ ಮಂದಣ್ಣ ತಾವು ಬಾಲಿವುಡ್‌ಗೆ ಕಾಲಿಡಲು ಕಾರಣರಾರು ಎಂಬುದನ್ನು ಬಿಚ್ಚಿಟ್ಟಿದ್ದಾರೆ.

  ಹೌದು ಬ್ಯಾಕ್ ಟು ಬ್ಯಾಕ್ ಚಿತ್ರಗಳಲ್ಲಿ ಕಾಣಿಸಿಕೊಳ್ಳುವ ಮೂಲಕ ದೇಶಾದ್ಯಂತ ಮನೆಮಾತಾಗಿರುವ ಕೊಡಗಿನ ಚೆಲುವೆ ಸದ್ಯ ಬಿಗ್ ಬಿ ಅಮಿತಾಭ್ ಬಚ್ಚನ್‌ರೊಂದಿಗೆ ನಟಿಸಿರುವ "ಗುಡ್‌ ಬೈ’ ಚಿತ್ರ ಬಿಡುಗಡೆಗೆ ಕಾಯುತ್ತಿದ್ದಾರೆ. ಈ ವೇಳೆ ತಾವು ಬಾಲಿವುಡ್‌ಗೆ ಬರಲು ಕಾರಣ ಯಾರೆಂಬುದನ್ನು ರಶಮ್‌ಇಕಾ ಹೇಳಿಕೊಂಡಿದ್ದಾರೆ. ಪತ್ರಕರ್ತರ ಜೊತೆ ಮಾತನಾಡುತ್ತಾ, ಬಾಲಿವುಡ್‌ ಸಿನಿಮಾ ರಂಗಕ್ಕೆ ತಾನು ಎಂಟ್ರಿ ಕೊಡಲು ಪ್ರೇಕ್ಷಕರೇ ಕಾರಣ ಎಂದಿದ್ದಾರೆ. ಪ್ರೇಕ್ಷಕರಿಗೆ ನಾನು ಬಾಲಿವುಡ್ ಸಿನಿಮಾದಲ್ಲಿ ಕಾಣಿಸಿಕೊಳ್ಳಬೇಕೆಂಬ ಆಸೆಯಿತ್ತು. ಬಾಲಿವುಡ್ ಸಿನಿಮಾದಲ್ಲಿ ನನ್ನ ನಟನೆ ನೋಡುವುದು ಅವರಿಗೂ ಇಷ್ಟವಾಗಿದ್ದ ಕಾರಣ ಇಲ್ಲಿ ಅವಕಾಶ ಪಡೆದುಕೊಂಡೆ. ಪುಷ್ಪ ಸಿನಿಮಾವು ನಾನು ಬಾಲಿವುಡ್‌ ಸಿನಿಮಾಗಳನ್ನು ಒಪ್ಪಿಕೊಳ್ಳಲು ಹೆಚ್ಚಿನ ಧೈರ್ಯ ನೀಡಿತು. ಪುಷ್ಪ ಸಿನಿಮಾಕ್ಕೆ ಪ್ರೇಕ್ಷಕರು ನೀಡಿದ ಪ್ರತಿಕ್ರಿಯೆಯ ಫಲವೇ ಬಾಲಿವುಡ್‌ನಲ್ಲೂ ನನ್ನ ಪ್ರತಿಭೆ ಅನಾವರಣಕ್ಕೆ ಕಾರಣವಾಗಿದೆ ಎಂದಿದ್ದಾರೆ.

  ʼಗುಡ್‌ ಬೈʼ ಚಿತ್ರ ಅಕ್ಟೋಬರ್‌ 7ರಂದು ಬಿಡುಗಡೆಗೊಳ್ಳಲಿದೆ. ವಿಕಾಸ್‌ ಬಹ್ಲ್ ನಿರ್ದೇಶನದ ʼಗುಡ್‌ ಬೈʼ ಸಿನಿಮಾದಲ್ಲಿ ಅಮಿತಾಭ್‌ ಬಚ್ಚನ್‌, ನೀನಾ ಗುಪ್ತಾ, ಪಾವೈಲ್ ಗುಲಾಟಿ, ಸುನಿಲ್ ಗ್ರೋವರ್ ಮುಂತಾದವರು ನಟಿಸುತ್ತಿದ್ದಾರೆ. ಇನ್ನು ಗುಡ್ ಬೈ ಮಾತ್ರವಲ್ಲದೆ, ರಶ್ಮಿಕಾ ʼಮಿಷನ್‌ ಮಜ್ನುʼ, ʼಅನಿಮಲ್ʼ ಎಂಬ ಇನ್ನೆರಡು ಬಾಲಿವುಡ್ ಚಿತ್ರದಲ್ಲಿಯೂ ಕಾಣಿಸಿಕೊಳ್ಳಲಿದ್ದಾರೆ.