ಪುಷ್ಪ-2ರಲ್ಲಿ ಕನ್ನಡತಿ ಪ್ರಿಯಾಮಣಿ ನಟನೆ?

•   Thu, Aug 04 2022 04:02:17 PM



• ಮುಂಬೈ, ಆ 04 (DaijiworldNews/DB): ಪ್ಯಾನ್ ಇಂಡಿಯಾ ಮಟ್ಟದಲ್ಲಿಯೂ ದೊಡ್ಡ ಸದ್ದು ಮಾಡಿದ್ದ ಅಲ್ಲು ಅರ್ಜುನ್-ರಶ್ಮಿಕಾ ಮಂದಣ್ಣ ನಟನೆಯ ’ಪುಷ್ಪ’ ಚಿತ್ರ ಬಾಲಿವುಡ್‌ನಲ್ಲಿ ಸಖತ್ ಆಗಿಯೇ ಕ್ರೇಜ್ ಹುಟ್ಟಿಸಿತ್ತು. ಇದೀಗ ಪುಷ್ಪ ಮೊದಲ ಭಾಗದ ಯಶಸ್ಸಿನ ನಂತರ 2ನೇ ಭಾಗ ಸಿದ್ದಗೊಳ್ಳುತ್ತಿದೆ. ಆದರೆ ಇದರಲ್ಲಿಯೂ ಕನ್ನಡತಿಯೊಬ್ಬರಿಗೆ ಅವಕಾಶ ನೀಡಲಾಗಿದೆ ಎಂಬ ಸುದ್ದಿ ಹರಿದಾಡುತ್ತಿದೆ.

  ಪುಷ್ಪ ಸಿನೆಮಾದಲ್ಲಿ ಕನ್ನಡತಿ ರಶ್ಮಿಕಾ ಮಂದಣ್ಣ ಅವರು ನಾಯಕಿಯಾಗಿದ್ದರು. ಈ ಸಿನೆಮಾದ ಯಶಸ್ಸಿನ ನಂತರ ಪುಷ್ಪ-೨ರಲ್ಲಿ ಕನ್ನಡದ ನಟಿ ಪ್ರಿಯಾಮಣಿ ಅವರು ನಟಿಸಲಿದ್ದಾರೆ ಎಂಬ ಮಾತುಗಳು ಕೇಳಿ ಬರುತ್ತಿದೆ.

  ಸಿನೆಮಾ ಭರ್ಜರಿ ಹಿಟ್ ಆದ ಖುಷಿಯಲ್ಲೇ ಚಿತ್ರತಂಡದಿಂದ ೨ನೇ ಭಾಗದ ಸಿದ್ದತೆಗಳು ನಡೆಯುತ್ತಿವೆ. ನಿರ್ದೇಶಕ ಸುಕುಮಾರ್​ ಅವರು ೨ನೇ ಭಾಗವನ್ನೂ ಸೂಪರ್ ಹಿಟ್ ಮಾಡಲು ಎಲ್ಲಾ ರೀತಿಯ ತಯಾರಿಗಳನ್ನು ಮಾಡುತ್ತಿದ್ದಾರೆ. ಅದ್ದೂರಿಯಾಗಿ ಸಿನೆಮಾ ಸೆಟ್ಟೇರಲಿದೆ ಎನ್ನಲಾಗಿದೆ. ಇದರಲ್ಲಿಯೂ ರಶ್ಮಿಕಾ ಮಂದಣ್ಣ ನಟಿಸಲಿದ್ದಾರೆ. ಆದರೆ ಅವರೊಂದಿಗೆ ಬಹುಭಾಷಾ ನಟಿ, ಕನ್ನಡತಿ ಪ್ರಿಯಾಮಣಿ ಅವರು ವಿಜಯ್ ಸೇತುಪತಿಗೆ ಜೊತೆಯಾಗಿ ನಟಿಸಲಿದ್ದಾರೆ ಎಂಬ ಮಾತುಗಳು ಟಾಲಿವುಡ್ ಅಂಗಳದಲ್ಲಿ ಕೇಳಿ ಬರುತ್ತಿದ್ದು, ಇದು ನಿಜವೇ ಆದಲ್ಲಿ ಇಬ್ಬರು ಕನ್ನಡತಿಯರ ನಟನೆ ನೋಡುವ ಅವಕಾಶ ಸಿನೆಮಾ ಅಭಿಮಾನಿಗಳಿಗೆ ಲಭಿಸಲಿದೆ.

  ಪ್ರಿಯಾಮಣಿ ನಟನೆ ಕುರಿತು ಚಿತ್ರತಂಡ ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ. ಸದ್ಯ ಪ್ರಿಯಾಮಣಿ ಶಾರುಖ್‌ ಖಾನ್ ಅವರೊಂದಿಗೆ ’ಜವಾನ್’ ಚಿತ್ರದಲ್ಲಿ ನಟಿಸುತ್ತಿದ್ದಾರೆ.