ಎಲ್ಲೆಲ್ಲೂ ಕೆಜಿಎಫ್ 2 ಹವಾ: ಕನ್ನಡದ ‘ರಾಕಿ’ ಅಬ್ಬರಕ್ಕೆ ಬಾಲಿವುಡ್ ಶೇಕ್

•   Thu, Apr 14 2022 05:08:32 PM



• ಬೆಂಗಳೂರು, ಏ 14 (DaijiworldNews/DB): ರಾಜ್ಯ ಮಾತ್ರವಲ್ಲದೆ, ದೇಶ-ವಿದೇಶಗಳಲ್ಲೂ ಬುಧವಾರ ರಾತ್ರಿಯಿಂದಲೇ ಕೆಜಿಎಫ್ 2 ಹವಾ ಶುರುವಾಗಿದೆ. ಪ್ರೇಕ್ಷಕರಂತೂ ರಾಕಿಂಗ್ ಸ್ಟಾರ್ ಯಶ್ ಮತ್ತು ಪ್ರಶಾಂತ್ ನೀಲ್ ಅಭಿನಯದ ಚಿತ್ರಕ್ಕೆ ಫುಲ್ ಮಾರ್ಕ್ಸ್ ಕೊಡುತ್ತಿದ್ದಾರೆ.

  ಚಿತ್ರಕ್ಕೆ ಐಎಂಡಿಬಿ ಮತ್ತು ಬುಕ್ ಮೈ ಶೋನಲ್ಲಿಯೂ ಉತ್ತಮ ರೇಟಿಂಗ್ ಸಿಕ್ಕಿದ್ದು, ಚಿತ್ರತಂಡದೊಂದಿಗೆ ಅಭಿಮಾನಿಗಳ ಕುತೂಹಲವೂ ಜಾಸ್ತಿಯಾಗಿದೆ. ಆಕ್ಷನ್ ದೃಶ್ಯ, ಡೈಲಾಗ್ಸ್, ಮೇಕಿಂಗ್ ಎಲ್ಲವೂ ಸೂಪರ್‌ಹಿಟ್ ಎನ್ನುತ್ತಿದ್ದಾರೆ ಪ್ರೇಕ್ಷಕರು.

  ವಿಶ್ವಾದ್ಯಂತ ಸುಮಾರು 10 ಸಾವಿರಕ್ಕೂ ಅಧಿಕ ಚಿತ್ರಮಂದಿರಗಳಲ್ಲಿ ಚಿತ್ರ ಬಿಡುಗಡೆಗೊಂಡಿದ್ದು, ಕರ್ನಾಟಕದಲ್ಲಿ ಸುಮಾರು 400ಕ್ಕೂ ಹೆಚ್ಚು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಗಿದ್ದು ಅದ್ದೂರಿ ಪ್ರದರ್ಶನ ಕಾಣುತ್ತಿದೆ. ಯಶ್ ತಂದೆ ಅರುಣ್ ಕುಮಾರ್ ಹಾಸನದಲ್ಲಿ ಚಿತ್ರ ವೀಕ್ಷಣೆ ಮಾಡಿದ್ದಾರೆ.

  ಪ್ರೇಕ್ಷಕರು, ಯಶ್ ಅಭಿಮಾನಿಗಳು ಮೊದಲ ದಿನವೇ ಸಾಮಾಜಿಕ ತಾಣಗಳಲ್ಲಿ ಉತ್ತಮ ಪ್ರತಿಕ್ರಿಯೆಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ. ಈ ನಡುವೆ ಟ್ವಿಟರ್​ನಲ್ಲಿ 'ಕೆಜಿಎಫ್​ 3' ಹ್ಯಾಶ್​ಟ್ಯಾಗ್ ಟ್ರೆಂಡ್ ಆಗಿದೆ. ಕೆಲವು ಕಡೆ ಚಿತ್ರಮಂದಿರಗಳಲ್ಲಿ ಚಿತ್ರ ಬಿಡುಗಡೆ ಮಾಡದ್ದಕ್ಕೆ ಯಶ್ ಅಭಿಮಾನಿಗಳಿಂದ ಪ್ರತಿಭಟನೆಯೂ ನಡೆದಿದೆ.

  ಅಮೆರಿಕಾದಲ್ಲಿಯೂ ಯಶ್ ಅಭಿಮಾನಿಗಳು ಚಿತ್ರಕ್ಕೆ ಫುಲ್ ಫಿದಾ ಆಗಿದ್ದು, ಇಡೀ ದಿನ ಎಲ್ಲಾ ಶೋಗಳನ್ನು ನೋಡುವುದಾಗಿ ಹೇಳಿಕೊಂಡಿದ್ದಾರೆ ಎನ್ನಲಾಗಿದೆ.

  ಡಾ.ರಾಜ್‌ಕುಮಾರ್ ಮೊಮ್ಮಕ್ಕಳಾದ ಯುವ ರಾಜ್ ಕುಮಾರ್, ವಿನಯ್ ರಾಜ್ ಕುಮಾರ್, ನಿರ್ದೇಶಕರಾದ ಸುನಿ, ಪವನ್ ಒಡೆಯರ್, ನಟಿ ಆಶಾ ಭಟ್, ಕೆಜಿಎಫ್ ಚಿತ್ರದಲ್ಲಿ ನಟಿಸಿರುವ ಶ್ರೀನಿಧಿ ಶೆಟ್ಟಿ, ಹರೀಶ್ ರೈ, ಅರ್ಚನಾ, ಅಯ್ಯಪ್ಪ, ಅವಿನಾಶ್, ಗರುಡ ಸೇರಿದಂತೆ ಅನೇಕ ಸೆಲೆಬ್ರಿಟಿಗಳೂ ಮೊದಲ ದಿನದ ಸಿನೆಮಾ ವೀಕ್ಷಿಸಿ ವಾವ್ಹ್ ಎಂದಿದ್ದಾರೆ.