ಸೈಫ್‌ ಅಲಿಖಾನ್‌ ನಟನೆಯ 'ತಾಂಡವ್'‌‌ ವೆಬ್‌‌‌ಸರಣಿ ಜ.15ಕ್ಕೆ ಬಿಡುಗಡೆ

•   Sat, Jan 09 2021 05:27:02 PM



• ಮುಂಬೈ, ಜ.09 (DaijiworldNews/PY): 2021ರ ಬಹು ನಿರೀಕ್ಷಿತ ವೆಬ್‌‌‌ಸರಣಿ ತಾಂಡವ್‌‌ ಜನವರಿ 15ಕ್ಕೆ ಅಮೆಜಾನ್ ಪ್ರೈಮ್‌ ವಿಡಿಯೊದಲ್ಲಿ ಬಿಡುಗಡೆಯಾಗಲಿದೆ.

  

  ತಾಂಡವ್‌‌ನಲ್ಲಿ ಸೈಫ್‌ ಅಲಿಖಾನ್‌ ಅವರು ಪ್ರಧಾನ ಪಾತ್ರದಲ್ಲಿ ನಟಿಸಿದ್ದು, ಸಮರ್‌ ಪ್ರತಾಪ್‌ ಸಿಂಗ್ ಪಾತ್ರಕ್ಕೆ ಬಣ್ಣ ಹಚ್ಚಿದ್ದಾರೆ.

  ರಾಜಕೀಯ ಕಥಾಹಿನ್ನೆಲೆ ಇರುವ ಈ ವೆಬ್‌ಸರಣಿಯನ್ನು ಅಲಿ ಅಬ್ಬಾಸ್‌ ಜಾಫರ್‌ ನಿರ್ದೇಶನ ಮಾಡಿದ್ದು, ಹಿಮಾಂಶು ಕಿಶನ್ ಮೆಹ್ರಾ ಹಾಗೂ ಅಲಿ ಅಬ್ಬಾಸ್ ಜಾಫರ್ ಅವರು ನಿಮಾಣದ ಹೊಣೆ ಹೊತ್ತಿದ್ದಾರೆ. ಈ ವೆಬ್‌ಸರಣಿಯು ಒಟ್ಟು ಒಂಭತ್ತು ಎಪಿಸೋಡ್‌ಗಳನ್ನು ಹೊಂದಿದೆ.

  ಟ್ರೇಲರ್‌ ಮೂಲಕ ನಿರೀಕ್ಷೆ ಹುಟ್ಟಿಸಿದ್ದ ಈ ವೆಬ್‌ಸರಣಿಯಲ್ಲಿ, ಸಮರ್‌‌ ತಮ್ಮ ತಂದೆಯ ನಿಗೂಢ ಸಾವಿನ ನಂತರ ಪ್ರಧಾನಿ ಹುದ್ದೆಯ ಆಕಾಂಕ್ಷಿಯಾಗಿ ರಾಜಕೀಯಕ್ಕೆ ಬರುತ್ತಾನೆ. ಡಿಂಪಲ್ ಕಪಾಡಿಯಾ ಅವರು ಅನುರಾಧಾ ಎನ್ನುವ ಪ್ರಧಾನಿ ಆಕಾಂಕ್ಷಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಕಥಾವಸ್ತುವಿನ ಬಗ್ಗೆ ಟ್ರೇಲರ್‌‌ನಲ್ಲಿ ಹೆಚ್ಚಿನ ವಿವರಣೆ ನೀಡಿಲ್ಲ.

  ಈ ವೆಬ್‌ಸರಣಿಯ ಮುಖ್ಯಭೂಮಿಕೆಯಲ್ಲಿ ಕುಮುದ್ ಮಿಶ್ರಾ, ಸಾರಾ ಜೇನ್ ಡಯಾಸ್, ಸೋನಾಲಿ ನಗ್ರಾನಿ, ಮೊಹಮದ್‌ ಜಿಸಾನ್‌ ಅಯೂಬ್‌, ಸಂಧ್ಯಾ ಮೃದುಲ್‌, ಗೌಹರ್ ಖಾನ್‌, ಡಿನೊ ಮೋರಿಯಾ, ಸುನಿಲ್ ಗ್ರೋವರ್‌, ಪರೇಶ್‌ ಪಹುಜಾ, ಕೃತಿಕಾ ಅವಸ್ಥಿ, ಟಿಗ್ಮಂಶು ಧುಲಿಯಾ, ಅನೂಪ್ ಸೋನಿ ಹಾಗೂ ಕೃತಿಕಾ ಕಮ್ರಾ ನಟಿಸಿದ್ದಾರೆ.