ಒಂದು ದಿನ ಮೊದಲೇ ಬಿಡುಗಡೆಯಾಯ್ತು ಕೆಜಿಎಫ್‌ ಚಾಪ್ಟರ್‌–2 ಟೀಸರ್‌

•   Fri, Jan 08 2021 08:32:02 AM



• ಬೆಂಗಳೂರು, ಜ. 08 (DaijiworldNews/MB) : ಹೊಂಬಾಳೆ ಫಿಲ್ಮ್ಸ್‌ ನಿರ್ಮಿಸುತ್ತಿರುವ ಬಹು ನೀರಿಕ್ಷಿತ ಕೆಜಿಎಫ್‌ ಚಾಪ್ಟರ್‌ 2 ಚಿತ್ರದ ಟೀಸರ್‌ ರಾಕಿಂಗ್‌ ಸ್ಟಾರ್‌ ಯಶ್‌ ಹುಟ್ಟು ಹಬ್ಬದ ದಿನವಾದ ಜನವರಿ 8ರಂದು ಬೆಳಿಗ್ಗೆ ಬಿಡುಗಡೆಯಾಗಲಿದೆ ಎಂದು ಈ ಹಿಂದೆ ಚಿತ್ರತಂಡ ಹೇಳಿದ್ದರೂ ಕೂಡಾ ಟೀಸರ್‌ ಮಾತ್ರ ಒಂದು ದಿನ ಮೊದಲೇ ಯೂಟ್ಯೂಬ್‌ನಲ್ಲಿ ಬಿಡುಗಡೆ ಮಾಡಲಾಗಿದೆ.

  

  ಜ. 7ರಂದು ರಾತ್ರಿ 9.29ಕ್ಕೆ ಬಿಡುಗಡೆ ಮಾಡಲಾಗಿದೆ. ಈ ಹಿಂದೆ ತಿಳಿಸಿದ್ದಂತೆ ಜ. 8ರಂದು ಬೆಳಿಗ್ಗೆ 10.18ಕ್ಕೆ ಬಿಡುಗಡೆ ಆಗಬೇಕಿತ್ತು. ಅದರಂತೆ ಯುಟ್ಯೂಬ್‌ನಲ್ಲಿ ಬಿಡುಗಡೆಗಾಗಿ ವೇಳಾಪಟ್ಟಿ(ಷೆಡ್ಯೂಲ್‌) ಮಾಡಲಾಗಿದ್ದ ಟೀಸರ್‌ ಸಾಮಾಜಿಕ ಜಾಲತಾಣಗಳಲ್ಲಿ ಸೋರಿಕೆಯಾಗಿಬಿಟ್ಟಿತ್ತು. ಈ ಸುದ್ದಿ ತಿಳಿದ ಕೂಡಲೇ ಎಚ್ಚೆತ್ತುಕೊಂಡ ಹೊಂಬಾಳೆ ಫಿಲ್ಮ್ಸ್‌ ತಾನೇ ಅಧಿಕೃತವಾಗಿ ಟೀಸರ್‌ನ್ನು ಬಿಡುಗಡೆ ಮಾಡಿದೆ ಎನ್ನಲಾಗಿದೆ.

  ಈ ಬಗ್ಗೆ ವಿಡಿಯೋ ಮೂಲಕ ಪ್ರತಿಕ್ರಿಯೆ ನೀಡಿರುವ ಯಶ್‌, ಯಾರೋ ಪುಣ್ಯಾತ್ಮರು, ಮಹಾನುಭಾವರು ಈಗಾಗಲೇ ಟೀಸರ್‌ ಲೀಕ್‌ ಮಾಡಿದ್ದಾರೆ. ಅವರಿಗೆ ಏನು ಸಂತೋಷ ಸಿಗುತ್ತೋ ಗೊತ್ತಿಲ್ಲ. ಆದರೂ ದೇವರು ಒಳ್ಳೆದು ಮಾಡಲಿ ಅವರಿಗೆ. ಮುಖ್ಯವಾಗಿ ಅಭಿಮಾನಿಗಳು ಕಾತುರರಾಗಿ ಕಾಯುತ್ತಿದ್ದೀರಿ. ಪರವಾಗಿಲ್ಲ, ಈಗ ನಿಮಗಾಗಿ ರಾತ್ರಿ ಬಿಡುಗಡೆ ಮಾಡಲಾಗುತ್ತದೆ ಎಂದು ಬಿಡುಗಡೆಗೂ ಮುನ್ನ ತಿಳಿಸಿದ್ದಾರೆ.

  ಚಿತ್ರದ ಯೂನಿವರ್ಸಲ್‌ ಟೀಸರ್‌ (ಎಲ್ಲ ಸಂದರ್ಭ, ಭಾಷೆ ಪ್ರದೇಶಗಳಿಗೆ ತಲುಪುವ ರೀತಿ) ಸಿದ್ಧಪಡಿಸಲಾಗಿದ್ದು ಬಿಡುಗಡೆಯಾದ 24 ನಿಮಿಷಗಳಲ್ಲಿ ಟೀಸರನ್ನು 1,47,300 ಮಂದಿ ವೀಕ್ಷಿಸಿದ್ದಾರೆ. 10 ಗಂಟೆಗಳಲ್ಲಿ 16,046,790 ಮಂದಿ ವೀಕ್ಷಿಸಿದ್ದಾರೆ.

  ಕೆಜಿಎಫ್‌ ಚಾಪ್ಟರ್‌ 2ನಲ್ಲಿ ಬಾಲಿವುಡ್‌ ನಟ ಸಂಜಯ್‌ ದತ್‌, ರವೀನಾ ಟಂಡನ್ ಇದ್ದಾರೆ. ವಿಜಯ್‌ ಕಿರಗಂದೂರು ನಿರ್ಮಿಸುತ್ತಿರುವ ಈ ಚಿತ್ರವನ್ನು ಪ್ರಶಾಂತ್ ನೀಲ್‌ ನಿರ್ದೇಶಿಸುತ್ತಿದ್ದಾರೆ.