ಕುತೂಹಲ ಕೆರಳಿಸಿದ ಮಂಸೋರೆ ನಿರ್ದೇಶನದ ಆಕ್ಟ್-1978 ಚಿತ್ರದ ಟ್ರೇಲರ್

•   Tue, Nov 03 2020 05:34:59 PM



• ಬೆಂಗಳೂರು, ನ. 03 (DaijiworldNews/MB) : ಹರಿವು ಮತ್ತು ನಾತಿಚರಾಮಿಯಂಥಹ ಅದ್ಭುತ ಸಿನಿಮಾಗಳನ್ನು ನೀಡಿದ ಮಂಸೋರೆ ನಿರ್ದೇಶನದ ಆಕ್ಟ್-1978 ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದ್ದು ಚಿತ್ರದ ಮೇಲೆ ಸಿನಿಪ್ರಿಯರಿಗಿರುವ ಕುತೂಹಲ ಹೆಚ್ಚಿಸಿದೆ.

  

  ನಾತಿಚರಾಮಿ ಸಿನಿಮಾ ಮೂಲಕ ಸದ್ದು ಮಾಡಿದ್ದ ಮಂಸೋರೆ ಅವರು ಈಗ ಆಕ್ಟ್-1978 ಸಿನಿಮಾದ ಟೀಸರ್‌ ಮೂಲಕವೇ ಕೂತೂಹಲ ಕೆರಳಿಸಿದ್ದಾರೆ. ಇತ್ತೀಚೆಗೆ ರಿಲೀಸ್‌ ಆಗಿದ್ದ ಥೀಮ್‌ ಸಾಂಗ್‌ ಕೂಡ ಜನಮೆಚ್ಚುಗೆ ಗಳಿಸಿತ್ತು.

  ಪುನೀತ್‌ ರಾಜ್‌ಕುಮಾರ್‌ ಅವರ 'ಪಿಆರ್‌ಕೆ ಆಡಿಯೋ' ಯೂಟ್ಯೂಬ್‌ ಚಾನೆಲ್‌ ಮೂಲಕ 'ACT-1978' ಟ್ರೇಲರ್‌ ಬಿಡುಗಡೆ ಆಗಿದೆ.

  ಬಸುರಿ ಹೆಂಗಸು ಪಾತ್ರದಲ್ಲಿ ಯಜ್ಞ ಶೆಟ್ಟಿ ಕಾಣಿಸಿಕೊಂಡಿದ್ದು ಅವರು ಹೊಟ್ಟೆಗೆ ಬಾಂಬ್‌ ಕಟ್ಟಿಕೊಂಡು ಸರ್ಕಾರಿ ಕಚೇರಿಗೆ ನುಗ್ಗುವ ದೃಶ್ಯ ಈ ಟ್ರೇಲರ್‌ನಲ್ಲಿ ಹೈಲೈಟ್‌ ಆಗಿದೆ. ಯಜ್ಞಾ ಶೆಟ್ಟಿ ಜೊತೆಗೆ ಕನ್ನಡ ಚಿತ್ರರಂಗದ ಪ್ರತಿಭಾವಂತ ನಟರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ನಟ 'ಸಂಚಾರಿ' ವಿಜಯ್‌, ಅಚ್ಯುತ್‌ ಕುಮಾರ್‌, ಕೃಷ್ಣ ಹೆಬ್ಬಾಳೆ, ಅವಿನಾಶ್‌, ಶ್ರುತಿ, ದತ್ತಣ್ಣ, ಪ್ರಮೋದ್‌ ಶೆಟ್ಟಿ, ಬಿ. ಸುರೇಶ, ಶೋಭರಾಜ್‌, ರಾಘು ಶಿವಮೊಗ್ಗ ಮುಂತಾದವರು ಈ ಸಿನಿಮಾಕ್ಕಾಗಿ ಬಣ್ಣಹಚ್ಚಿದ್ದು ದೇವರಾಜ್‌ ಆರ್‌. ನಿರ್ಮಾಣ ಮಾಡಿದ್ದಾರೆ.