ಪೈಲ್ವಾನ್ ನಲ್ಲಿ 'ಸುಶೀಲಾ' ಕಮಾಲ್ - ಬಾಲನಟಿಯಾಗಿ ಮಿಂಚಿದ ಕರಾವಳಿಯ ಪ್ರತಿಭೆ

•   Thu, Sep 12 2019 05:12:25 PM



• ದಾಕ್ಷಿಣಿ ಆರ್ 

  ಮಂಗಳೂರು, ಸೆ 12 (Daijiworld News/RD): ದೇಸಿ ಕಥೆಯೊಂದಿಗೆ ಜಬರ್ದಸ್ತ್ ಆಗಿ ಎಂಟ್ರಿ ನೀಡಿದ ಪೈಲ್ವಾನ್, ರಾಜ್ಯಾದ್ಯಂತ ಗುರುವಾರ ಬಿಡುಗಡೆಗೊಂಡಿದ್ದು, ಚಿತ್ರಕ್ಕೆ ಮೊದಲ ದಿನವೇ ಜನರಿಂದ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿದೆ. ಪೈಲ್ವಾನ್ ಚಿತ್ರದಲ್ಲಿ ಬಾಲನಟಿಯಾಗಿ ಕರಾವಳಿಯ ಯುವ ಪ್ರತಿಭೆ ವಂಶಿ ಆರ್ ಕೆ ಮಿಂಚುತ್ತಿದ್ದು, ಆಕೆಯ ನಟನೆಗೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

  

  

  

  

  ಪೈಲ್ವಾನ್ ಚಿತ್ರದಲ್ಲಿ ಬಾಲನಟಿಯಾಗಿ ವಂಶಿ ಆರ್ ಕೆ ಅಭಿನಯಿಸಿದ್ದು, ಚಿತ್ರದಲ್ಲಿ ಸುಶೀಲ ಪಾತ್ರಧಾರಿಯಾಗಿ ಕಾಣಿಸಿಕೊಂಡಿದ್ದು, ಚಿತ್ರದ ಕಥೆ ತಿರುವು ಪಡೆಯುವಲ್ಲಿ ಇವರ ಪಾತ್ರ ಪ್ರಮುಖವಾಗಿದೆ. ಇನ್ನು ಇವರು ಪೈಲ್ವಾನ್ ಚಿತ್ರದ ಶೂಟಿಂಗ್ ಗಾಗಿ  15 ದಿನಗಳ ಕಾಲ ಹೈದರಾಬಾದ್ ನಲ್ಲಿ, ಕಿಚ್ಚ ಸುದೀಪ್ ಹಾಗೂ ಬಾಲಿವುಡ್ ನಟ ಸುನೀಲ್ ಶೆಟ್ಟಿ ಜೊತೆ ಭಾಗಿಯಾಗಿದ್ದರು. 

  ಝೀ ಕನ್ನಡದ 'ಡ್ರಾಮಾ ಜ್ಯೂನಿಯರ್ಸ್ ಸೀಸನ್-2' ಶೋ ನಲ್ಲಿ ಭಾಗವಹಿಸಿ ವಿನ್ನರ್ ಆಗಿ 'ಜ್ಯೂನಿಯರ್ ಲಕ್ಷ್ಮಿ' ಎಂದು ಬಿರುದು ಪಡೆದುಕೊಂಡಿರುವ ವಂಶಿ ಆರ್ ಕೆ ಮೂಲತಃ ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲೂಕಿನ ಅಮರ ಮುಡ್ನೂರು ಗ್ರಾಮದವರು. ಇವರು ಆರ್ ಕೆ. ರತ್ನಕುಮಾರ್ ಮತ್ತು ರೇವತಿ ರತ್ನಕುಮಾರ್ ದಂಪತಿಯ ಪುತ್ರಿ. ಪ್ರಸ್ತುತ ಕೊಣಾಜೆಯ ವಿಶ್ವಮಂಗಳ ಆಂಗ್ಲಮಾಧ್ಯಮ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಸುಗಮ ಸಂಗೀತದಲ್ಲಿ ಪರಿಣತಿ ಹೊಂದಿರುವ, ಇವರು ಕನ್ನಡ ಸಂಸ್ಕೃತಿ ಇಲಾಖೆಯ ಚಿಗುರು ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ಡ್ಯಾನ್ಸ್ ನ್ನ ಇಷ್ಟಪಡುವ ವಂಶಿ ಮೈಸೂರಿನ ಡಾನ್ಸಿಂಗ್ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ಬೆಳೆಯುವ ಸಿರಿ ಮೊಳಕೆಯಲ್ಲಿ ಎಂಬಂತೆ ಬಾಲ್ಯದಲ್ಲೇ ಎಲ್ಲಾ ಕ್ಷೇತ್ರದಲ್ಲಿ ಆಸಕ್ತಿ ಬೆಳೆಸಿಕೊಂಡಿರುವ ಬಹುಮುಖ ಪ್ರತಿಭೆ ವಂಶಿ.  ಕರುನಾಡ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅಭಿನಯಿಸಿದ ಪೈಲ್ವಾನ್ ಚಿತ್ರದಲ್ಲಿ ಪ್ರಮುಖ ಬಾಲನಟಿಯಾಗಿ ಅಭಿನಯಿಸಿದ್ದಾರೆ. ಇದೀಗ ಇವರ ಪಾತ್ರಕ್ಕೆ ಎಲ್ಲೆಡೆ ಮೆಚ್ಚುಗೆ ಸಿಕ್ಕಿದೆ.

  ವಿಶ್ವದಾದ್ಯಂತ ಸುಮಾರು 4000 ಸ್ಕ್ರೀನ್‌ಗಳಲ್ಲಿ 'ಪೈಲ್ವಾನ್' ಬಿಡುಗಡೆಯಾಗಿದ್ದು, ಪಂಚಭಾಷೆಯಲ್ಲಿ ಈ ಚಿತ್ರ ನಿರ್ಮಾಣಗೊಂಡಿದ್ದು, ಸ್ಯಾಂಡಲ್ ವುಡ್ ಮಾತ್ರವಲ್ಲದೇ ಟಾಲಿವುಡ್, ಕಾಲಿವುಡ್, ಮೋಲಿವುಡ್ ಮತ್ತು ಬಾಲಿವುಡ್ ಗಳಲ್ಲೂ ಭರ್ಜರಿ ಹವಾ ಸೃಷ್ಟಿಸಿದೆ. ಇನ್ನು ಚಿತ್ರದಲ್ಲಿ ಮೂಲತಃ ಮಂಗಳೂರಿನವರಾದ ಬಾಲಿವುಡ್ ನಟ ಸುನೀಲ್ ಶೆಟ್ಟಿ ಕನ್ನಡದಲ್ಲಿ ಮೊದಲ ಬಾರಿಗೆ ಕಾಣಿಸಿಕೊಂಡಿದ್ದಾರೆ.