ಎಷ್ಟೇ ಬ್ಯುಸಿಯಿದ್ದರೂ, ನಿಮ್ಮ ಷೋಷಕರ ಜೊತೆ ಸಮಯ ಕಳೆಯುವುದನ್ನು ಮರೆಯದಿರಿ ಎಂದ ಅಕ್ಷಯ್ ಕುಮಾರ್

•   Fri, Aug 30 2019 10:48:45 AM



• ಲಂಡನ್,ಆ 30(Daijiworld News/RD): ಬಾಲಿವುಡ್ ಖ್ಯಾತ ನಟ ಅಕ್ಷಯ್ ಕುಮಾರ್ ಅವರು ತಮ್ಮ ತಾಯಿಯನ್ನು ವ್ಹೀಲ್ ಚೇರ್‌ನಲ್ಲಿ ಕೂರಿಸಿ ಲಂಡನ್ ಸುತ್ತಾಡಿಸಿದ್ದಾರೆ. ಜೊತೆಗೆ ಈ ಈ ವಿಡಿಯೋ ಇನ್‍ಸ್ಟಾಗ್ರಾಂನಲ್ಲಿ ಶೇರ್ ಮಾಡುವ ಮೂಲಕ ಒಳ್ಳೆಯ ಸಂದೇಶವನ್ನು ನೀಡಿದ್ದಾರೆ.

  

  ಈ ವಿಡಿಯೋದಲ್ಲಿ ಅಕ್ಷಯ್ ತಮ್ಮ ತಾಯಿಯನ್ನು ವ್ಹೀಲ್ ಚೇರ್‌ ನಲ್ಲಿ ಕೂರಿಸಿ ಆಕೆಯನ್ನು ತಳ್ಳುತ್ತಾ ಅವರ ಜೊತೆ ಮಾತನಾಡುತ್ತಾ ಹೋಗುತ್ತಾ ಇರುವ ವಿಡಿಯೋ ಅನ್ನು ರೆಕಾರ್ಡ್ ಮಾಡಿದ್ದಾ‌ರೆ. ಈ ವಿಡಿಯೋವನ್ನು ತಮ್ಮ ಇನ್ಸ್ ಸ್ಟಾಗ್ರಾಂನಲ್ಲಿ ಹಾಕಿ ಅಕ್ಷಯ್ ಅದಕ್ಕೆ, “ಅಮ್ಮನ ಜೊತೆ ಸಮಯ ಕಳೆಯುವ ಸಲುವಾಗಿ ಶೂಟಿಂಗ್‍ನಿಂದ ಬಿಡುವು ಮಾಡಿಕೊಂಡಿದ್ದೇನೆ. ನೀವು ಎಷ್ಟೇ ಬ್ಯುಸಿಯಿದ್ದರೂ ಹಾಗೂ ಬೆಳೆಯುತ್ತಿದ್ದರೂ, ನಿಮ್ಮ ಪೋಷಕರಿಗೆ ವಯಸ್ಸಾಗುತ್ತಿದೆ ಎಂಬುದನ್ನು ಮರೆಯಬೇಡಿ. ಆದ್ದರಿಂದ ಸಾಧ್ಯವಾದಾಗಲೆಲ್ಲಾ ಅವರೊಂದಿಗೆ ಸಮಯ ಕಳೆಯಿರಿ” ಎಂದು ಭಾವುಕವಾಗಿ ಪೋಸ್ಟ್ ಹಂಚಿಕೊಂಡಿದ್ದಾರೆ. ಈ ಮೂಲಕ ಅಕ್ಷಯ್ ಕುಮಾರ್ ತಮ್ಮ ತಾಯಿ ಅರುಣಾ ಭಾಟಿಯಾ ಜೊತೆ ಹೆಚ್ಚಿ ಸಮಯವನ್ನು ಕಳೆದಿದ್ದಾರೆ.

  ಇದೀಗ ಈ ವಿಡಿಯೋ ಸಾಮಾಜಿಕ ಜಾಲಾತಾಣದಲ್ಲಿ ಹರಿದಾಡುತ್ತಿದ್ದು, ಅಕ್ಷಯ್ ಅವರ ಈ ವಿಡಿಯೋ ಅಭಿಮಾನಿಗಳು ಇಷ್ಟಪಟ್ಟಿದ್ದಾರೆ. ಅಲ್ಲದೆ ಇದಕ್ಕೆ ಒಳ್ಳೆಯ ಕಮೆಂಟ್ ಮಾಡಿ ಅಕ್ಷಯ್ ಅವರನ್ನು ಹೊಗಳುತ್ತಿದ್ದಾರೆ. ಈ ಪೋಸ್ಟ್ ಗೆ ನಟಿ, ಅಕ್ಷಯ್ ಅವರ ಪತ್ನಿ ಟ್ವಿಂಕಲ್ ಖನ್ನಾ ಕಿಸ್ ಎಮೋಜಿ ಹಾಕುವ ಮೂಲಕ ಕಮೆಂಟ್ ಮಾಡಿದ್ದಾರೆ. ಕೆಲವು ದಿನಗಳ ಹಿಂದೆ ಅಕ್ಷಯ್ ಅವರ ತಾಯಿ ಮೊಣಕಾಲಿನ ಶಸ್ತ್ರಚಿಕಿತ್ಸೆ ಆಗಿದೆ.