ಸ್ಯಾಂಡಲ್‌ವುಡ್‌ನತ್ತ ಹೆಜ್ಜೆ ಹಾಕಿದ ಪುತ್ತೂರಿನ ಬೆಡಗಿ

•   Tue, Aug 20 2019 05:30:32 PM



• ಮಂಗಳೂರು,ಆ 20 (Daijiworld News/RD): ಕರಾವಳಿಯು ಪ್ರತಿಭೆಗಳ ಆಗರವಾಗಿದ್ದು ಹಲವಾರು ಪ್ರತಿಭೆಗಳು ವಿವಿಧ ಕ್ಷೇತ್ರದಲ್ಲಿ ಮಿಂಚುತ್ತಿರುವುದನ್ನು ಕಾಣಬಹುವುದು. ಅಂತಹವರಲ್ಲಿ ಒಬ್ಬರಾದ ಅಂಕಿತಾ ಪಟ್ಲ, ಚಿಕ್ಕ ವಯಸ್ಸಿನಲ್ಲಿಯೇ ಬಣ್ಣದ ಬದುಕಿಗೆ ಹೆಜ್ಜೆ ಇಟ್ಟು, ತಮ್ಮ ನಟನಾಶೈಲಿಯ ಮೂಲಕ ಕೋಸ್ಟಲ್‌ ವುಡ್‌ ಪ್ರೇಕ್ಷಕರಿಂದ ಭೇಷ್ ಎನಿಸಿಕೊಂಡು, ಸ್ಯಾಂಡಲ್‌ವುಡ್‌ನತ್ತ ಹೆಜ್ಜೆ ಹಾಕುತ್ತಿರುವ ಇವರು, ಮೂಲತಃ ಪುತ್ತೂರಿನ ಬೆಡಗಿ.

  

  ಶೇಖರ್ ಕೆ. ಮತ್ತು ಪ್ರೇಮ ದಂಪತಿಯ ಮುದ್ದಿನ ಮಗಳಾದ ಅಂಕಿತಾ ಪಟ್ಲ, ಸಿನಿಮಾರಂಗಕ್ಕೆ ಬರುವುದರ ಬಗ್ಗೆ ಎಂದೂ ಕೂಡ ಯೋಚನೆ ಮಾಡಿರದ ಅಂಕಿತಾ ಇದೀಗ ತುಳುನಾಡಿನ ಮನೆ ಮಗಳಾಗಿ ಮಿಂಚುತ್ತಿದ್ದಾರೆ. ಪ್ರಾಥಮಿಕ, ಪ್ರೌಢಶಾಲಾ ಶಿಕ್ಷಣವನ್ನು ಪುತ್ತೂರಿನ ವಿವೇಕಾನಂದ ಶಿಕ್ಷಣ ಸಂಸ್ಥೆಯಲ್ಲಿ ಪೂರೈಸಿದ ಇವರು, ಪದವಿ ಶಿಕ್ಷಣವನ್ನು ದರ್ಬೆ ಸಂತ ಫಿಲೋಮಿನಾ ಕಾಲೇಜಿನಲ್ಲಿ ಮುಗಿಸಿದರು. ಪ್ರಸ್ತುತ ಉಜಿರೆ ಎಸ್‌ಡಿಎಂ ಕಾಲೇಜಿನಲ್ಲಿ ಸಮೂಹ ಸಂವಹನ ಮತ್ತು ಪತ್ರಿಕೋದ್ಯಮದಲ್ಲಿ ಸ್ನಾತಕೋತ್ತರ ಪದವಿ ಕಲಿಯುತ್ತಿದ್ದಾರೆ.

  ‘ಅಮ್ಮೆರ್ ಪೊಲೀಸ’ ಚಿತ್ರದ ಮೂಲಕ ಸಿನಿ ಜರ್ನಿ ಶರು ಮಾಡಿದ ಅಂಕಿತಾ, ಬಳಿಕ ‘ಅಪ್ಪೆ ಟೀಚರ್’ ಚಿತ್ರದಲ್ಲಿ ನಟಿಸುವ ಮೂಲಕ ಕೋಸ್ಟಲ್‌ವುಡ್‌ನಲ್ಲಿ ಸೈ ಎನಿಸಿಕೊಂಡಿದ್ದು, ಇದೀಗ ಅವರು ನಟಿಸಿರುವ ‘ಬಲಿಪೆ’ ಚಿತ್ರವು ಶೂಟಿಂಗ್ ಮುಗಿಸಿ ತೆರೆಕಾಣಲು ಸಜ್ಜಾಗಿದೆ. ಹೀಗೆ ಕೋಸ್ಟಲ್ ವುಡ್ ನಲ್ಲಿ ಸಾಲು ಸಾಲು ಅವಕಾಶ ಗಿಟ್ಟಿಸಿಕೊಂಡಿರುವ ಅಂಕಿತಾ ಸ್ಯಾಂಡಲ್‌ವುಡ್‌ ನತ್ತ ತಮ್ಮ ಪಯಣ ಶುರು ಮಾಡಿದ್ದಾರೆ.

  ಕಾಲೇಜು ದಿನಗಳಲ್ಲಿ ನೃತ್ಯಕಲೆಯ ಮೇಲೆ ಅಪಾರ ಆಸಕ್ತಿ ಹೊಂದಿದ್ದ ಅಂಕಿತಾ, ಡಿಗ್ರಿಯಲ್ಲಿರುವಾಗ ಅಲ್ಬಂ ಸಾಂಗ್ ಒಂದಕ್ಕೆ ಹೆಜ್ಜೆ ಹಾಕುವ ಅವಕಾಶ ದೊರೆಯಿತು. ಇದು ಅವರ ಪ್ರತಿಭೆಗೆ ಹಿಡಿದ ಕೈಗನ್ನಡಿಯಾಗಿದ್ದು, ನಂತರ ‘ರೈಲ್ವೆ 129’ ಎಂಬ ಸಾಕ್ಷ್ಯ ಚಿತ್ರದಲ್ಲಿ ಬಣ್ಣ ಹಚ್ಚಿದರು. ಸಾಕ್ಷ್ಯ ಚಿತ್ರದಲ್ಲಿ ಸಿಕ್ಕ ಅವಕಾಶದಿಂದ ಇಂದು ನನಗೆ ಸಿನಿರಂಗದಲ್ಲಿ ಏನನ್ನಾದರು ಸಾಧಿಸಲು ಸಾಧ್ಯವಾಯಿತು ಎನ್ನುತ್ತಾರೆ ಅಂಕಿತಾ. ‘ಅಮ್ಮೆರ್ ಪೊಲೀಸ’ ಸಿನಿಮಾದಲ್ಲಿ ನಾಲ್ಕು ದೃಶ್ಯಗಳಲ್ಲಿ ಇವರು ಕಾಣಿಸಿಕೊಂಡಿದ್ದು, ಇದರಿಂದಾಗಿ ‘ಅಪ್ಪೆ ಟೀಚರ್’ ಸಿನಿಮಾದಲ್ಲಿ ನಾಯಕನ ತಂಗಿಯಾಗಿ ಅಭಿನಯಿಸಲು ಅವಕಾಶ ದೊರೆಯಿತು ಎಂದರು. ಕಾಲೇಜು ಜೀವನದಲ್ಲಿಯೇ ಸಿನಿಮಾರಂಗದ ಕದ ತಟ್ಟಿದ ಅಂಕಿತಾ ಕಿರುತೆರೆಯ ‘ಶಾಂತಂ ಪಾಪಂ’ನಲ್ಲೂ ಅಭಿನಯಿಸಿದ್ದಾರೆ.

  ಸದ್ಯಕ್ಕೆ ತುಳು ಮತ್ತು ಕನ್ನಡ ಭಾಷೆಯಲ್ಲಿ ಏಕಕಾಲಕ್ಕೆ ನಿರ್ಮಾಣವಾಗುತ್ತಿರುವ ‘ಕಾರ್ನಿಕಾ’ ಸಿನಿಮಾದ ಶೂಟಿಂಗ್‌ನಲ್ಲಿ ತನ್ನನ್ನು ತಾನು ತೊಡಗಿಸಿಕೊಂಡಿರುವ ಇವರು ಬಳಿಕ ಸ್ಯಾಂಡಲ್‌ವುಡ್‌ ನತ್ತ ಪ್ರಯಾಣ ಬೆಳೆಸಿದ್ದಾರೆ. ಈಗಾಗಲೇ ಕನ್ನಡ ಚಿತ್ರದಲ್ಲಿ ನಾಯಕಿ ನಟಿಯಾಗಿ ಅವಕಾಶ ಒದಗಿ ಬಂದಿದ್ದು ಸಿನಿಮಾದ ಚಿತ್ರೀಕರಣ ಇನ್ನೂ ಪ್ರಾರಂಭವಾಗಾಬೇಕಿದೆ. ಹೀಗಾಗಿ ಸಿನಿಮಾದ ಹೆಸರು, ನಾಯಕ ನಟ ಮತ್ತು ನಿರ್ದೇಶಕರ ಬಗ್ಗೆ ಯಾವುದೇ ಸುಳಿವನ್ನು ಅಂಕಿತಾ ಬಿಟ್ಟುಕೊಟ್ಟಿಲ್ಲ. ಸದ್ಯ ಕೋಸ್ಟಲ್‌ವುಡ್‌ನಲ್ಲಿ ‘ಬಲಿಪೆ’ ಎಂಬ ಹಾರರ್ ಸಿನಿಮಾ ಬಿಡುಗಡೆಯಾಗಲು ಸಜ್ಜಾಗಿದ್ದು, ಇದರಲ್ಲಿ ಅಂಕಿತಾ ವೈದ್ಯೆಯಾಗಿ ಕಾಣಿಸಿಕೊಂಡಿದ್ದಾರೆ. ಚಿತ್ರೀಕರಣ ಸಂಪೂರ್ಣವಾಗಿ ಮುಗಿಸಿದ ಚಿತ್ರತಂಡ ಸದ್ಯದಲ್ಲೇ ತೆರೆಕಾಣುವ ನಿರೀಕ್ಷೆ ಸಜ್ಜಾಗಿದೆ.

  ಹೆತ್ತವರ ಸದಾ ಪ್ರೋತ್ಸಾಹದಿಂದ ತನಗೆ ದೊರೆತ ಅವಕಾಶಗಳನ್ನು ಸದುಪಯೋಗಿಸಿಕೊಳ್ಳುವ ಮೂಲಕ ಈ ಹಂತ ತಲುಪಿದ್ದೇನೆ, ನಿಮಾರಂಗದಲ್ಲಿ ಮುಂದುವರಿಯಲು ಸಾಧ್ಯವಾಗದೆ ಇದ್ದರೆ ಮಾಧ್ಯಮರಂಗದಲ್ಲಿ ಮುಂದುವರಿಯುವ ಆಸೆ ಇದೆ ಎಂದು ಹೇಳುವ ಅಂಕಿತಾ ಪಟ್ಣ. ಇನ್ನಷ್ಟು ಸಾಧನೆ ಮಾಡಲಿ ಎಂದು ಆಶಿಸೋಣ.