ಅಗಸ್ಟ್ 9 ರಂದು ಬೆಲ್ಚಪ್ಪ ತೆರೆಗೆ

•   Fri, Jul 12 2019 05:20:43 PM



• ಮಂಗಳೂರು, ಜು 12 (Daijiworld News/MSP): ರಜನೀಶ್‌ ದೇವಾಡಿಗ ನಿರ್ದೇಶನದ ಸಿನಿಮಾ " ಬೆಲ್ಚಪ್ಪ " ಬಿಡುಗಡೆ ಸಿದ್ದವಾಗಿದೆ. 14 ದಿನಗಳಲ್ಲಿ ಶೂಟಿಂಗ್‌ ಮುಗಿಸಿ ದಾಖಲೆ ಬರೆದಿದ್ದ ಸಿನಿಮಾ ಇದೇ ಅಗಸ್ಟ್ 9 ರಂದು ತೆರೆಗೆ ಬರಲಿದೆ. ಚಿತ್ರದ ನಿರ್ದೇಶಕರೇ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ಬೆಲ್ಚಪ್ಪ ತೆರೆಗಪ್ಪಳಿಸುವ ದಿನಾಂಕವನ್ನು ಬಹಿರಂಗಪಡಿಸಿದ್ದಾರೆ.

  

  ಜಯದುರ್ಗಾ ಪ್ರೊಡಕ್ಷನ್ ಬ್ಯಾನರ್ ನಡಿಯಲ್ಲಿ ತಯಾರಾದ ಚಿತ್ರ ಬೆಲ್ಚಪ್ಪ ಸಿನಿಮಾ ತೆಲಿಪರೆ ಇಪ್ಪಂದೆ ಸಾಧ್ಯನೆ ಇಜ್ಜಿ ಎಂಬ ಅಡಿಬರಹವನ್ನು ಹೊಂದಿದೆ. ಅಂದಹಾಗೆ, ನಿರ್ದೇಶಕ ರಜನೀಶ್‌ ದೇವಾಡಿಗ ಅವರಿಗೆ ಬೆಲ್ಚಪ್ಪ ಎರಡನೇ ಚಿತ್ರ. ಯಾವುದೇ ಕತ್ತರಿ ಪ್ರಯೋಗವಿಲ್ಲದೆ ಸೆನ್ಸರ್ ಮಂಡಳಿಯಿಂದ ಯು ಸರ್ಟಿಫಿಕೇಟ್ ಪಡೆದ ಬೆಲ್ಚಪ್ಪದ ಚಿತ್ರದ ನಾಯಕ ಯಾರು ಎನ್ನುವ ಪ್ರಶ್ನೆಗೆ "ಕಥೆಯೇ ನಾಯಕ " ಎನ್ನುತ್ತಾರೆ ನಿರ್ದೇಶಕ ರಜನೀಶ್.

  ತುಳು ಸಂಸ್ಕೃತಿ ಮತ್ತು ಕೃಷಿಗೆ ಹತ್ತಿರವಿರುವ ಆಡುಭಾಷೆಯ "ಬೆಲ್ಚಪ್ಪ " ಶಬ್ದ ಕೇಳಲು ತಮಾಷೆಯಂತೆ ಕಂಡರೂ ಇದರ ಹಿಂದೆ ಉತ್ತಮ ಕಥೆಯಿದೆ. ನೋವಿನ ಭಾವನೆಯಿದೆ ಎಂದು ಹೇಳುತ್ತಾರೆ ರಜನೀಶ್‌. ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದಿರುವ ರಜನೀಶ್ ಇದರಲ್ಲಿ ಪೋಷಕ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರದಲ್ಲಿ ಅರವಿಂದ ಬೋಳಾರ್‌ ಅವರದ್ದು ಪ್ರಮುಖ ಪಾತ್ರದಲ್ಲಿದ್ದು ಉಳಿದಂತೆ ಉಮೇಶ್‌ ಮಿಜಾರ್‌, ದೀಪಕ್‌ ರೈ ಪಾಣಾಜೆ, ನಾಯಕಿಯಾಗಿ ಯಶಸ್ವಿ ದೇವಾಡಿಗ, ಸುಕನ್ಯಾ ಮುಂತಾದವರು ಚಿತ್ರದಲ್ಲಿದ್ದಾರೆ.