ಮತ್ತೊಂದು ಹೊಸ ಸಿನಿಮಾಗೆ ಸಹಿ ಹಾಕಿದ ಕರಾವಳಿಯ ಚೆಲುವೆ ಸೋನಾಲ್‌ ಮೊಂತೆರೋ

•   Tue, Jun 18 2019 09:10:47 AM



• ಮಂಗಳೂರು, ಜೂ18(Daijiworld News/SS): ಯೋಗರಾಜ್‌ ಭಟ್ಟರ “ಪಂಚತಂತ್ರ’ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿರುವ ಸೋನಾಲ್‌ ಮೊಂತೆರೋ ಇದೀಗ ವಸಿಷ್ಠ ಸಿಂಹ ಅಭಿನಯದ ತಲ್ವಾರ್ ಪೇಟೆ ಚಿತ್ರದಲ್ಲಿ ಅಭಿನಯಿಸಲಿದ್ದಾರೆ.

  

  ಈಗಾಗಲೇ ಕನ್ನಡದ ಕೆಲವು ಚಿತ್ರಗಳಲ್ಲಿ ನಟಿಸಿದ್ದು, “ಪಂಚತಂತ್ರ’ ಚಿತ್ರ ಅವರಿಗೆ ಉತ್ತಮ ಹೆಸರು ತಂದುಕೊಟ್ಟಿತ್ತು. ಸದ್ಯ ಸೋನಾಲ್‌ ನಾಯಕಿಯಾಗಿರುವ “ಡೆಮೋ ಪೀಸ್‌’ ಚಿತ್ರ ಬಿಡುಗಡೆಗೆ ಸಿದ್ಧವಿದೆ. ಈ ನಡುವೆಯೇ ಹೊಸ ಸಿನಿಮಾದ ಅವಕಾಶ ಸೋನಾಲ್‌ಗೆ ಸಿಕ್ಕಿದೆ.

  ಪಂಚತಂತ್ರ ಬಳಿಕ ಇದೀಗ ಬುದ್ಧಿವಂತ - 2 ಚಿತ್ರದ ಶೂಟಿಂಗ್'ನಲ್ಲಿ ಬ್ಯುಸಿಯಾಗಿರುವ ಸೋನಲ್ ನಂತರ ಯೋಗರಾಜ್ ಭಟ್ ರ ಗಾಳಿಪಟ 2 ಚಿತ್ರದಲ್ಲಿ ನಟಿಸಲಿದ್ದಾರೆ. ಈ ಮಧ್ಯೆ ತಲ್ವಾರ್ ಪೇಟೆ ಚಿತ್ರಕ್ಕೆ ಸಹಿ ಹಾಕಿದ್ದಾರೆ.

  ರಾಮ್ ಲಕ್ಷ್ಮಣ್ ಎಂಬುವರು ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆ ಜೊತೆಗೆ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ನಂದ ಕುಮಾರ್ ಛಾಯಾಗ್ರಹಣ. ಹರ್ಷವರ್ಷನ್ ಸಂಗೀತ ಸಂಯೋಜಿಸುತ್ತಿದ್ದಾರೆ. ಜುಲೈನಲ್ಲಿ ಚಿತ್ರ ಸೆಟ್ಟೇರಲಿದೆ ಎನ್ನಲಾಗಿದೆ.

  ಕನ್ನಡದಲ್ಲಿ ಬಿಝಿಯಾಗುತ್ತಿರುವ ಸೋನಾಲ್‌ಗೆ ತುಳು ಚಿತ್ರರಂಗದಿಂದಲೂ ಸಾಕಷ್ಟು ಅವಕಾಶಗಳು ಬರುತ್ತಿವೆ. ಆದರೆ ಡೇಟ್ಸ್‌ ಹೊಂದಿಸಲು ಆಗದ ಕಾರಣ ಯಾವುದನ್ನೂ ಒಪ್ಪಿಕೊಂಡಿಲ್ಲವಂತೆ. ನಾನು ತುಳು ಚಿತ್ರರಂಗವನ್ನು ಯಾವತ್ತೂ ಮರೆಯೋದಿಲ್ಲ. ಇವತ್ತು ನನ್ನನ್ನು ಬೇರೆ ಬೇರೆ ಚಿತ್ರರಂಗಕ್ಕೆ ಹೋಗುವಂತೆ ಮಾಡಿದ್ದು ತುಳು. ಮುಂದೆಯೂ ತುಳುವಿನಲ್ಲಿ ನಟಿಸಲಿದ್ದೇನೆ ಎನ್ನುವುದು ನಟಿ ಸೋನಾಲ್‌ ಮಾತು.