ಎಸ್.ಪಿ ಬಾಲಸುಬ್ರಮಣ್ಯಂ ಅವರಿಗಿಂದು ಹುಟ್ಟುಹಬ್ಬದ ಸಂಭ್ರಮ

•   Tue, Jun 04 2019 11:21:54 AM



• ಚೆನ್ನೈ,ಜೂ04(DaijiworldNews/AZM):ಗಾನಕೋಗಿಲೆ ಎಸ್.ಪಿ.ಬಾಲಸುಬ್ರಮಣ್ಯಂ ಅವರಿಗೆ ಇಂದು ಹುಟ್ಟುಹಬ್ಬದ ಸಂಭ್ರಮ. ಎಸ್.ಪಿ.ಬಿ. ಹಾಡುಗಳು ಎಂದರೆ ಅದು ನಮ್ಮನ್ನು ಯಾವುದೋ ಸ್ಪಪ್ನ ಲೋಕಕ್ಕೆ ಕರೆದುಕೊಂಡು ಹೋಗುತ್ತದೆ. ಅಂತಹ ಮ್ಯಾಜಿಕಲ್ ಶಬ್ದ ಎಸ್.ಪಿ.ಬಿ ಅವರದ್ದು.

  

  ಎಸ್.ಪಿ.ಬಾಲಸುಬ್ರಮಣ್ಯಂ ಕೇವಲ ಒಂದು ಭಾಷೆಯಲ್ಲ. ಹಲವು ಭಾಷೆಗಳಲ್ಲಿ ತಮ್ಮ ಚಾತುರ್ಯ ಸಾಭೀತುಪಡಿಸಿದ್ದಾರೆ. ಅವರ ಕಂಠದಿಂದ ಹೊರಬರುವ ಸುಮಧುರ ಹಾಡುಗಳು ಇಂದಿಗೂ ಹಿಟ್ ಲೀಸ್ಟ್ ನಲ್ಲಿದೆ.
  ಎಸ್‌.ಪಿ. ಬಾಲಸುಬ್ರಹ್ಮಣ್ಯಂ ಹುಟ್ಟಿದ್ದು ನಮ್ಮ ನೆರೆಯ ಆಂಧ್ರಪ್ರದೇಶದ ಚಿತ್ತೂರಿನ ಕೊನೇಟಮ್ಮಪೇಟಾ ಎಂಬ ಗ್ರಾಮದಲ್ಲಿ. ಇವರು ಹಾಡುಗಾರಿಕೆ ಕ್ಷೇತ್ರಕ್ಕೆ ಬರಲು ಮೂಲ ಕಾರಣ ಇವರ ತಂದೆಯೇ. ಇವರು ಶಾಸ್ತ್ರೀಯವಾಗಿ ಸಂಗೀತ ಕಲಿಯದೇ ಇದ್ದರೂ ತಂದೆ ಎಸ್‌.ಪಿ. ಸಾಂಬಮೂರ್ತಿ ಅವರು ಹೇಳುತ್ತಿದ್ದ ಹರಿಕಥೆಯನ್ನು ಕೇಳಿಕೊಂಡು, ಮನೆಯಲ್ಲಿದ್ದ ಹಾರ್ಮೋನಿಯಂ, ಕೊಳಲುಗಳನ್ನು ಇಷ್ಟಬಂದ ಹಾಗೆ ನುಡಿಸುತ್ತಾ ಎಸ್.ಪಿ.ಬಿಯವರು ಬೆಳೆದರು.

  ಇವರು ಕನ್ನಡದವರು ಅಲ್ಲದಿದ್ದರೂ ಹಲವು ಸೂಪರ್ ಹಿಟ್ ಕನ್ನಡ ಹಾಡುಗಳನ್ನು ಹಾಡಿ ಕನ್ನಡದವರೇ ಆಗಿ ಬಿಟ್ಟರು. ಕನ್ನಡವಲ್ಲದೆ,ತಮಿಳು, ತೆಲುಗು, ಮಲೆಯಾಳಂ, ಹಿಂದಿ, ಕೊಂಕಣಿ, ತುಳು, ಮರಾಠಿ, ಪಂಜಾಬಿ ಹೀಗೆ ನಾನಾ ಭಾಷೆಗಳಲ್ಲಿ ಘಟಾನುಘಟಿ ನಾಯಕರುಗಳಿಗೆ ಹಾಡಿರುವ ಇವರ ಒಟ್ಟು ಹಾಡುಗಳ ಸಂಖ್ಯೆ 40 ಸಾವಿರಕ್ಕೂ ಅಧಿಕ. ಹಾಗೆ ನೋಡಿದರೆ ಎಸ್‌.ಪಿ.ಬಿ ಗಾಯನ ಕ್ಷೇತ್ರವನ್ನು ಪ್ರವೇಶ ಮಾಡುವ ಮುನ್ನ ಒಂದೊಂದು ಭಾಷೆಗೆ ಒಬ್ಬೊಬ್ಬರು ದಿಗ್ಗಜ ಹಾಡುಗರು ಇದ್ದರು. ತೆಲುಗಿನಲ್ಲಿ ಘಂಟಸಾಲ, ತಮಿಳಿನಲ್ಲಿ ಟಿ.ಎಂ. ಸುಂದರ್‌ ರಾಜನ್‌, ಕನ್ನಡದಲ್ಲಿ ಪಿ.ಬಿ. ಶ್ರೀನಿವಾಸ್‌ ಖ್ಯಾತಿಯ ಉತ್ತುಂಗದಲ್ಲಿ ಇದ್ದವರು. ಇದೇ ವೇಳೆಗೆ ಎಂಟ್ರಿ ಕೊಟ್ಟಿದ್ದ ಎಸ್‌.ಪಿ.ಬಿ ಈ ಮೂರೂ ಭಾಷೆಗಳಲ್ಲಿ ತಮ್ಮ ಖ್ಯಾತಿಯನ್ನು ಹೆಚ್ಚಿಸಿಕೊಂಡಿದ್ದರು. ಬಹುಶಃ ನಾವೂ ನೀವು ಜೀವಮಾನದಲ್ಲಿ ಕೇಳಿರದೇ ಇರುವಷ್ಟುಹಾಡುಗಳನ್ನು ಎಸ್‌.ಪಿ.ಬಿ ಹಾಡಿ ಮುಗಿಸಿದ್ದಾರೆ.

  ಬಾಲಿವುಡ್‌ನ ಖ್ಯಾತ ತಾರೆ ಅನಿಲ್‌ ಕಪೂರ್‌ ಸಿನಿ ಜರ್ನಿ ಆರಂಭವಾಗಿದ್ದೇ ಕನ್ನಡದ 'ಪಲ್ಲವಿ ಅನು ಪಲ್ಲವಿ' ಚಿತ್ರದ ಮೂಲಕ. ಇದರಲ್ಲಿನ 'ನಗುವ ನಯನ ಮಧುರ ಮೌನ' ಹಾಡು ಇಂದಿಗೂ ಸೂಪರ್‌ ಹಿಟ್‌. ಇದನ್ನು ಹಾಡಿದ್ದು ಎಸ್‌.ಪಿ.ಬಿ.

  ವಿಷ್ಣುವರ್ಧನ್‌ ಆಯಂಗ್ರಿ ಯಂಗ್‌ ಮ್ಯಾನ್‌ ಆಗಿ ಕಾಣಿಸಿಕೊಂಡಿದ್ದ ಚಿತ್ರ 'ರಾಮಾಚಾರಿ'ಯನ್ನು ಮನಸ್ಸಿಗೆ ತಂದುಕೊಂಡರೆ ಮೊದಲು ನೆನಪಾಗುವುದು 'ಹಾವಿನ ದ್ವೇಷ ಹನ್ನೆರಡು ವರುಷ' ಹಾಡು. ಇದರ ಹಿಂದಿನ ದನಿ ಎಸ್‌.ಪಿ.ಬಿ.

  ಪ್ರಣಯರಾಜ ಶ್ರೀನಾಥ್‌ಗಾಗಿ 'ಸ್ನೇಹದ ಕಡಲಲ್ಲಿ', ಅನಂತ್‌ ನಾಗ್‌ಗಾಗಿ 'ಎಲ್ಲಿರುವೇ ಮನವ ಕಾಡುವ ರೂಪಸಿಯೇ' ಎಂದು ಅನಂತ್‌ ನಾಗ್‌ ಅವರನ್ನು ರೊಮ್ಯಾಂಟಿಕ್‌ ಹೀರೋ ಮಾಡಿದ್ದರು. ಶಂಕರ್‌ ನಾಗ್‌ ಅವರ 'ನಲಿವಾ ಗುಲಾಬಿ ಹೂವೆ' ಹಾಡಿಗೆ ದನಿ ನೀಡಿ ಭಗ್ನ ಪ್ರೇಮಿಗಳ ಪಾಲಿನ ಮಾತುಗಳಿಗೆ ದನಿಯೊದಗಿಸಿದ್ದರು. ಇದಿಷ್ಟೇ ಅಲ್ಲದೇ, ಎಪ್ಪತ್ತು ಎಂಭತ್ತರ ದಶಕದಿಂದ ಇಂದಿನವರೆಗೂ ದಕ್ಷಿಣ ಭಾರತದ ಎಲ್ಲಾ ಸ್ಟಾರ್‌ಗಳ ಹಿಂದಿನ ಆತ್ಮವೇ ಆಗಿದ್ದಾರೆ ಎಸ್.ಪಿಬಿಯವರು.

  ಇಂದು ಹುಟ್ಟುಹಬ್ಬದ ಸಂಭ್ರಮದಲ್ಲಿರುವ ಎಸ್.ಪಿ.ಬಾಲಸುಬ್ರಹ್ಮಣಂ ಅವರಿಗೆ ಶುಭ ಕೋರುವ... ಹಾಗೂ ಅವರ ಮತ್ತಷ್ಟು ಸುಮಧುರ ಹಾಡುಗಳನ್ನು ಗಾನಪ್ರಿಯರು ಸವಿಯುವಂತ್ತಾಗಲಿ ಎಂದು ಹಾರೈಸುವ.