ಬೆನೆಡಿಕ್ಟಾ ಡಿಸಿಲ್ವಾ, ಬೆಂದುರ್
ಬೆನೆಡಿಕ್ಟಾ ಡಿಸಿಲ್ವಾ, ಆಮ್ಚಿ ಮೊಗಾಳ್ ಮಾಂಯ್ ಹ್ಯಾ ಸಂಸಾರಾಂತ್ ಆಸ್ತಾನಾ ಸಾದೆಂ, ನಿತಳ್, ಕಶ್ಟಿ, ನಿಸ್ವಾರ್ಥಿ ಜಿಣಿ ಜಿಯೆಲ್ಯಾ ಮ್ಹಳ್ಳೆಂ ಖರೋಖರ್ ಸತ್. ತಿಚೆ ಮರ್ಣಾವಿಧಿಕ್ ಜಮ್ಲಲಿಂ ಹಾಕಾ ಜಿವಿ ಸಾಕ್ಸ್. ಉಂಚ್ಲೆಂ ಚಿಂತಪ್, ವಿಶೇಸ್ ಧೈರ್, ಕಶ್ಟಾಂ ಸಾಗೊರಾಂತ್ ಧೈರಾನ್ ಉಪ್ಯೆಂವ್ಚಿ ವಿಶಿಸ್ಟ್ ಸಕತ್ ಧನ್ಯಾ ದೆವಾನ್ ತಿಚೆ ವಯ್ರ್ ವೊತಲ್ಲಿ ಏಕ್ ದೈವಿಕ್ ಕಾಣಿಕ್. ಹ್ಯಾ ಪಾಸೊತ್ ಆನಿ ಆಮ್ಚೆ ಆವಯ್ ವಯ್ರ್ ವೊತಲ್ಲ್ಯಾ ಸರ್ವ್ ದೆಣ್ಯಾಂ ಆನಿ ಬೆಸಾಂವಾಂ ಪಾಸೊತ್ ಆಮಿ ಸರ್ವೆಸ್ಪರಾಕ್ ಋಣಿ, ಖಾಲ್ತೆಪಣಿ. ಘರಾಂತ್ ಆಯಿಲ್ಯಾ ಸೈರ್‍ಯಾಂಕ್ ತಿ ವೆಂಗೆಂತ್ ಆರಾವ್ನ್ ಧರಿ. ತಾಂಕಾಂ ಆಧಾರ್ಸುನ್, ಸುಧಾರ್ಸುನ್, ಆಪ್ಣಾಕಚ್ ಖಾಲಿ ಕರ್ನ್ ತ್ಯಾಗ್ ಕರ್ನ್ ಹೆರಾಂಚೊ ಮೋಗ್ ಆನಿ ಸೆವಾ ತಿಣೆ ಕೆಲ್ಯಾ. ಹಾಸ್ತ್ಯಾ ತೊಂಡಾನ್ ಸಮೇಸ್ತಾಂಕ್ ಸಾಂಬಾಳ್ಳಾಂ. ತಿಚಾ ಭುರ್ಗ್ಯಾಂಕ್ ಮೊಗಾನ್ ವಾಡೊವ್ನ್ ಬರೊ ಫುಡಾರ್ ದಿಲಾ. ಭುರ್ಗ್ಯಾಂಕ್ ಮೊಗಾನ್ ವೆಂಗೊನ್ ವ್ಹಡ್ ಕೆಲಾಂ. ಮಾಂಯ್ ಆಜ್ ಭೊಗ್ತಾ ಸರ್ಗಿಂ ಸುಖ್, ಹಿಚ್ ಆಮಾ ಸರ್ವಾಂಚಿ ಪಾತ್ಯೆಣಿ ಆನಿ ಆನಂದ್. ಹೆ ಪಾತ್ಯೆಣೆಕ್ ತಿಚೆ ಪೆಟೆ ಬಿತರ್ ನಿದಲ್ಲ್ಯಾ ಬರಿ ತಿಚ್ಯಾ ತೊಂಡಾ ವಯ್ರ್ ಪರ್ಜಳ್ಚೊ ಹಾಸೊಚ್ ಜಿವಿ ಸಾಕ್ಸ್.
ಮಾಂಯ್ ಏಕ್ ದೀಸ್ ಆಮೀಂಯ್ ತುಂ ಗೆಲ್ಲ್ಯಾ ದೆವಾಲಾಗಿಂ ಯೇಂವ್ಕ್ ಆಸಾ. ತುಜ್ಯಾ ಮಾಗ್ಣ್ಯಾಚಿ ಆಮ್ಕಾಂ ವಿಶೇಸ್ ಗರ್ಜ್ ಆಸಾ. ಆಮಿ ಪರತ್ ದೆವಾ ಹುಜಿರ್ ತುಕಾ ಮೆಳಾಸರ್ ಆದೇವ್ಸ್ ತುಕಾ ಮಾಗ್ತಾಂವ್. ಸರ್ಗಿಂ ಆಂಜಾ ಕೊರಾಂಚೆ ಮೆಳಿಂತ್ ದೈವಿಕ್ ಆನಂದ್ ತುಕಾ ಲಾಬೊಂ ಮ್ಹಣ್ ಲಾಲೆವ್ನ್ ಮಾಗ್ತಾಂವ್.
ಮಾಂಯ್ಕ್ ಆಸ್ಪತ್ರೆಂತ್ ಮೊಗಾನ್ ಸಾಂಬಾಳುನ್, ಹರ್ಯೆಕೆ ರಿತಿನ್ ಆಧಾರ್ಸುನ್, ತಿಚೊ ಆಕೇರ್ ಉಸ್ವಾಸ್ ಆಸ್ತಾಸರ್ ಸಾಂಗಾತ್ ದಿಲ್ಲ್ಯಾ ಫಾ. ಮುಲ್ಲರ್ ಶಿಬ್ಬಂದಿಕ್ ಆಮಿ ಋಣಿ ಆಸಾಂವ್. ಆತ್ಮಿಕ್ ಸಹಕಾರ್ ದಿವುನ್ ಆಧಾರ್ಸುನ್ ವೆಲ್ಲ್ಯಾ ಮಾ. ಬಾ. ರಿಚರ್ಡ್ ಕುವೆಲ್ಯೊ ಆನಿ ಸಮೇಸ್ತ್ ಯಾಜಕಾಂಕ್ ಆಮಿ ಆಭಾರಿ. ಆಮ್ಚೊ ಮೊಗಾಳ್ ದೊತೊರ್ ಕುಲ್‌ದೀಪ್ ಮೊರಾಸ್ ಆನಿ ಸಮೇಸ್ತ್ ತಾಚೆ ಸಾಂಗಾತಿ ದೊತೊರಾಂಚೊ ಆಮಿ ಉಪ್ಕಾರ್ ಆಟೈತಾಂವ್. ಬೆಂದುರ್ ಫಿರ್ಗಜೆಚೆ ವಿಗಾರ್ ಬಾಪ್, ಸಹಾಯಕ್ ಯಾಜಕ್ ತಶೆಂಚ್ ಮಿಸಾಚೆಂ ಬಲಿದಾನ್ ಭೆಟಯಿಲ್ಲೆ ಮಾ. ಬಾ. ಡೆನಿಸ್ ಮೊರಾಸ್, ಮಾ. ಬಾ. ಸ್ಟೇನಿ ಗೋವಿಯಸ್, ಮಾ. ಬಾ. ಗ್ರೇಶನ್ ಆಲ್ವಾರಿಸ್, ಮಾ. ಬಾ. ವಿಕ್ಟರ್ ಕ್ರಾಸ್ತಾ ಹಾಂಕಾಂ ಆಮ್ಚೆಂ ಕುಟಮ್ ಋಣಿ. ಆಮ್ಚ್ಯಾ ಕಶ್ಟಾಂ ವೆಳಾರ್ ಮೊಗಾಚಿ ವೇಂಗ್ ದೀವ್ನ್ ಸುಧಾರ್ಸುನ್ ವೆಲ್ಲ್ಯಾ ಆನಿ ಧೈರ್ ದಿಲ್ಲ್ಯಾ ಸಮೇಸ್ತ್ ಆಮ್ಚ್ಯಾ ಮೊಗಾಚ್ಯಾಂಕ್ ಆಮಿ ಆಭಾರಿ ಆಸಾಂವ್. ಆಕ್ರೇಚೆಂ ತರಿ ಗರ್ಜೆಚೆಂ, ಆಮ್ಚೆ ಜಿಣ್ಯೆಂತ್ ಹರ್‍ಕೆಕ್ ಪಾವ್ಟಿಂ ವಿಶೇಸ್ ಸಹಾಯ್ ದಿಲ್ಲ್ಯಾ ದಾಯ್ಜಿ ವರ್ಲ್ದ್.ಕೊಮಾಕ್ ಆಮಿ ಋಣಿ. ವೊಲ್ಟರ್, ಮೆಲ್ವಿನ್ ಆನಿ ಕ್ಲಾರಿ ತುಮ್ಕಾಂ ಆಮಿ ಸದಾಂಚ್ ಆಭಾರಿ. ಸೊಭಿತ್ ಶೃದ್ದಾಂಜಲಿ ಅರ್ಪಿಲ್ಲ್ಯಾ ಮಂಗ್ಳುರ್ ಕಥೊಲಿಕ್ ಕೇಂದ್ರ್, ಮಸ್ಕತ್ ಸಮಿತಿ ಆನಿ ಸಾಂದ್ಯಾಂಕ್ ಆಮಿ ಆಭಾರಿ ಜಾವ್ನ್ ಆಸಾಂವ್. ಹಾಂಗಾಸರ್ ನಾಂವಾಂ ಉಲ್ಲೇಕ್ ಕೆಲ್ಲ್ಯಾ ಆನಿ ಉಲ್ಲೇಕ್ ಕರುಂಕ್ ಜಾವ್ನಾ ತರಿ ಆಮ್ಚೆ ಖಾತಿರ್ ಮಾಗೊನ್ ಆಮ್ಚ್ಯಾ ಕಾಳ್ಜಾ ಮನಾಂನಿ ರಾಜ್ ಕೆಲ್ಲ್ಯಾ ಸಮೇಸ್ತಾಂಚೆರ್ ಧನ್ಯಾ ದೆವಾಚಿಂ ಬರ್ಪೂರ್ ಆಶಿರ್ವಾದಾಂ ಆಮಿ ಸದಾಂಚ್ ಮಾಗ್ತಾಂವ್.
ಮೊಗಾಚೆ ಮಾಂಯ್ಕ್ ಅರ್ಪಿಲ್ಲೆಂ ಕವನ್ ಹಾಂಗಾಸರ್ ಪರ್ಗಟುಂಕ್ ಅಶೆತಾಂ.
ಹೊ ಭಾಂಗ್ರಾಳೊ ಆವ್ಕಾಸ್ ಕರುನ್ ದಿಲ್ಲ್ಯಾ ಧನ್ಯಾ ದೆವಾಕ್ ಋಣಿ ಜಾವ್ನ್ ಆಸಾಂ.
ಆಮೊಲಿಕ್ ದೆಣೆಂ....
ಮನ್ಶಾ ಕುಳಾಚೆಂ ಆಮೊಲಿಕ್ ದೆಣೆಂ
ತಿಚೆಂ ಋಣ್ ಫಾರಿಕ್ ಕೆಲಾಂ ಕೊಣೆಂ?
ಆವಯ್ ನಾತ್ಲೆಂ ರಿತೆಂ ಜಿಣೆಂ
ಸಾಳ್ಕಾಚೆಂ ಜೀವನ್ ಸುರ್ಯಾ ವಿಣೆಂ.
ನೋವ್ ಮಾಸ್ ಗರ್ಭಾಂತ್ ತಿಚ್ಯಾ ವ್ಹಾವೊವ್ನ್
ಭುಂಯ್ ಪಡ್ತಾಂ ಪಡ್ತಾಂ ದೂಖ್ ಧೈರಾನ್ ಸೊಸುನ್
ರಾತ್ಚಿ ನೀದ್ ಸಾಂಡುನ್, ಪಾನೊ ದೀವ್ನ್ ಪೊಶೆವ್ನ್
ಕಶ್ಟ್ ದೂಖ್ ಖಿರೊನ್ ಪಿಯೆವ್ನ್
ಮೊಗಾನ್ ಸಾಂಬಾಳ್ಳಾಂ ಆಕೇರ್ ಉಸ್ವಾಸ್ ಪರ್ಯಾಂತ್
ತಿಚೊ ಮೋಗ್ ನಿಸ್ವಾರ್ಥಿ ಮೋಗ್
ಪ್ರತಿಫಳ್ ಆಶೆನಾತ್ಲೊ ತ್ಯಾಗ್
ಆತಾಂ ಭೊಗ್ತಾಂ ಸಂಸಾರಿಂ ಸುಖ್
ಆವಯ್ಚ್ಯಾ ಮೊಗಾ ತ್ಯಾಗಾಚೊ ಶಿರಾಂಧಾರಿ ಪಾವ್ಸ್
ಆಜ್ ಆಂಜಾ ಕೊರಾಂಚೆ ಮೆಳಿಂತ್ ತಿ ಭೊಗ್ತಾ ಸರ್ಗಿಂ ಸುಖ್
ತಿಚಿ ಕಶ್ಟಿ, ನಿಸ್ವಾರ್ಥಿ, ತ್ಯಾಗಾಭರಿತ್ ಸಾಧಿ ಜಿಣಿ ದಿತಾ ಪಾತ್ಯೆಣೆಚಿ ರುಜ್ವಾತ್
ತಿಚ್ಯಾ ಮರ್ಣಾಂತ್ ದೆವಾನ್ ದಾಕಯ್ಲೆಲಿ ಆಜಾಪಾಂಚಿ ಸಕತ್
ಜಾಂವ್ಕ್ ಪಾವ್ಲೊ ಕುಟ್ಮಾದಾರಾಂಚೊ ಧೈರಾದಿಕ್ ಸಂಕೇತ್.....
ದೇವ್ ಜರಿ ಮಾಕಾ ವಿಚಾರಿ
ಜಾಯ್ ಕಿತೆಂ ಹ್ಯಾ ಸಂಸಾರಿಂ
ಮಾಂಯ್ ಮೋಗ್ ಜಿಣ್ಯೆ ಪಯ್ಣಾರಿ
ಉದಾರ್ ಜಾವ್ನ್ ಆವಯ್ಚೊ ಘೆವ್ನ್
ತಿಚಿಂ ಮೆಟಾಂ ಚಲೊಂಕ್ ಅಶೆತಾಂ ಜಿಣಿ ಸರಾಸರಿ....
ಆವಯ್ ಥಾವ್ನ್ ಮೆಕ್ಳೆಂ ಜಿವಿತ್ ಆಡುಕ್ ತರಿ
ಸರ್ಗಿಂ ತಿಣೆ ಭೊಗ್ಚೊ ತೊ ಸಂತೊಸ್ ನಿಯಾಳುನ್
ದೆವಾಚ್ಯಾ ಭಾಗೆವಂತ್ ಖುಶೆಕ್ ಘಾಲುನ್ ಖಾಲ್ತಿಮಾನ್, ತಿಚ್ಯಾ ಉಡಾಸಾನ್
ತಿಚ್ಯಾ ಸಂತೊಸಾನ್ ಆಮ್ಚೋಯ್ ಸಂತೊಸ್ ಮೆಳೊನ್ ಜಿಣಿ ಸಾರ್ತಾಂವ್ ಮೊರಾಸರಿ......
ಮೊಗಾಚಿ ಶೃದ್ಧಾಂಜಲಿ ಅರ್ಪಿತಾತ್, ಭಯ್ಣಿ, ಕುಟ್ಮಾದಾರಾಂ, ಮೊಗಾಳ್ ಭುರ್ಗಿಂ ಅನಿ ನಾತ್ರಾಂ....
CLICK HERE FOR OBITUARY